हरसिद्धि त्रिशक्ति भवानीया १२ दँया सिद्धि दनेगु पर्व: स्वां तपुलिं प्याखं क्वचाल

हरसिद्धि त्रिशक्ति भवानीया १२ दँया सिद्धि दनेगु पर्व: स्वां तपुलिं प्याखं क्वचाल


जितेन्द्र महर्जन/नेपालमण्डल टेलिभिजन, कार्तिक २२ -एतिहासिकलिसें  सांस्कृतिक नेवाः बस्ति यलया जलदेशय्   हरसिद्धि त्रिशक्ति भवानीया थुगुसिइ पुनःस्थापना कथं १२ दँया सिद्धि दनेगु पर्व न्ह्यानाच्वंगु दु।

थ्वहे झ्वलय् छगू महत्वपूर्ण ज्याखँ स्वां तपुलिइ पुयाः प्याखं ल्हुइगु ज्या वंगु कछलाथ्व दुतिया खुन्हू क्वःचागु दु। प्याखं ल्हूइबलय् माःगु तिसाः वसः,ख्वापाः छुं नं मतसें स्वां जक तया दयेकातःगु तपुलिइ पुयाः  ल्हुइगु थुगु प्याखंयात स्वां तपुलिइ प्याखं धायेगु यानाच्वंगु दु।

सिद्धि दनेगु झ्वलय् याइगु थीथी ज्याखं मध्ये साैल दनेगु इलय्  बाजं थायेगु व प्याखं ल्हुइ सयेकूपिंनिगु तालिमया परीक्षण कथं सकल गुरू व देवगण दथुइ प्याखं क्यनेगु, ल्हुइगु याइगु खसाः थ्व स्वां तपुइ प्याखं धासाः सकल नागरिकपिन्त १२ दँया सिद्धि दनेगु ज्या थन तक थ्यन धकाः जानकारी बिइगु कथं क्यनिगु खः।

जात्राया इलय् क्यनिगु १९ लूमध्ये १० लू क्यनिइ। १२ दँया छक जक क्यनिगु स्वां तपुलिइ प्याखँ स्वयेत मनूत म्वःम्व जुइगु खः।  जात्राया इलय् थें हे द्यः कुहाँविज्याकाः १९ गू लू मध्ये १० लू क्यना द्यः थहाँविज्याइगु खः।

(श्रोतः त्रिशक्ति भवानी द्यःया द्यःपि(पुजारी) लिसें संस्कृतकःमीलिसें हरिसिद्धि माध्यामिक विद्यालयया पूर्व प्रधानाध्यापक धर्मगोविन्द महर्जन)