इनाखा गणेद्यःया देगःया पुनःनिर्माण क्वचाल

इनाखा गणेद्यःया देगःया पुनःनिर्माण क्वचाल


असोज ३ - येँय् महानगरपालिका वडा २१ य् दुगु इनाखा गणेद्यःया देगःया पुनःनिर्माण क्वचाःगु दु। पुनःनिमार्ण जूगु देगःया येँय् महानगरपालिकाया मेयर विद्यासुन्दर शाक्य व संघीय संसद लिसें पूर्व मन्त्री कृष्णगोपाल श्रेष्ठं मंकाः कथं म्हिगः यानादीगु खः।

उलेज्या लिपा नवासें मेयर शाक्यं येँय्या ऐतिहासिक सम्पदायात धार्मिक पर्यटनलिसें स्वाकाः  मौलिक पहिचानया व स्थानीयया आयय् थकायेगु निगुलिं ज्या छक्कल सञ्चालन यायेगु नीतिकथं महानगरं ज्या यानाच्वगु धयादिल। वयकलं विवाद मदुगु सम्पदाया मर्मत, सम्भार वा पुननिर्माण जुइधुक्कुंगु धासें विवाद दुगु व गुठी संस्थान, पुरातत्व विभागलगायत निकायलिसें स्वामित्व जुयाः महानगरया ल्हातय् मदुगु सम्पदाय् ज्या यायेमखंगु धयादिल । वयकलं इनाखा गणेद्यःया देगः लिक्क दुगु सवल बहालय् दुगु २१४ दँ पुलांगु नासः देगःया नं उलेज्या यानादीगु खः। अथेहे वडा १२ य् दुगु पुखुसी महाद्यःया देगःया नं पुनःनिर्माणलिपा उलेज्या जुइधुक्कुंगु दु।

ज्याझ्वलय् पूर्वमन्त्री कृष्णगोपाल श्रेष्ठं येँय् महानगरपालिकां न्ह्याकूगु सम्पदा निर्माण–पुर्ननिर्माणया अभियानय् थःम्ह नं ग्वाहालि यायेगु प्रतिवद्धता प्वकादिल।

देगः पुननिर्माणअन्तर्गत न्हापांगु चरणय् ६६ लख ६२ द्वःतकाया ज्या जूगु खःसाः थुकिइ येँय् महानगरपालिकां ५५ लख तका उपलब्ध याःगु खः। उपभोक्ता समितिया अध्यक्ष महेन्द्रमान सिंह डंगोलया कथं निगूगु चरणय्  १४ लख तकातिया ज्या जूगु दु। गुकिं महानगरं थप ६ लख ९९ द्वःतका उपलब्ध याःगू खः। पुननिर्माणया लागि इनाखा युवा क्लवं नं लागत सहभागिता याःगु धागु दु।

देगःया पुजारी राजु डंगोलया कथं थुगु देगः ३०० दँति पुलांगु खः।

ज्याझ्वलय् देगः पुननिर्माणय् ग्वाहालि यापिं दाता व स्थानीययात हनापौ लःल्हागु खः। ज्याझ्वलय्  वडाध्यक्ष उदयचुडामणि बज्राचार्यनापं जनप्रतिनिधितय्गु ब्वति दूगु खः।