यंकिदह इन्द्रदहलय् मेला

यंकिदह इन्द्रदहलय् मेला


असोज ४ - येँय्या पश्चिमय् लाःगु चन्द्रागिरि नगरपालिका–१ य् दुगु यंकिदह इन्द्रदहलय् मेला जूगु दु। दँय् दसं यंलाथ्व पून्हिखुन्हू इन्द्रदहलय् मेला जुइगु खः।

यंलाथ्व चतुर्दशीखुन्हू देवराज इन्द्रया पूजा यानाः भक्तजनत चाः च्वनिगु परम्परा दु । थ्वहे परम्पराकथं आइतबाः बहनी भक्तजनत इन्द्रदह वनाः मदुपिं थथितिया नामय् मतः च्याकाः चाः च्वंगु खः। आइतबाः चाः च्वना मदुपिनिगु आत्माया शान्तिया कामना यासें इन्द्रदहलय् दुगु इन्द्रया देगःलय् मतः च्याकाः भक्तजनतयसं सुथनिसें इन्द्रदहलय् स्नान यानाः गणेद्यः, इन्द्रलगायत द्यःतय्गु पूजा आराधना याःगु खः।

थगुने कोरोना महामारीया कारण मेला स्थगन याःगुलिं थुगुसिइ स्वास्थ्य सुरक्षाया मापदण्ड पूरा यानाः सञ्चालन याके बियागु धकाः नगर प्रमुख घनश्याम गिरीइ धयादिल। वय्कया कथं मेलाया लागि विसं २०७६ य् थें प्रचारप्रसार धासाः याःगु मदु। आस्थाया आधारय् वइपिं भक्तजनतय्त स्वास्थ्य सुरक्षाया विधि नालाः धार्मिक कर्म याकेब्यूगु दु। भक्तजनया लागि मास्क अनिवार्य यानागु धकाः नगरपालिकां धागु दु। मेलाया झ्वलय् नगरपालिका–१, २ व ३ या स्कूलतलिसें ज्याकुथिइ स्थानीय पर्व बिदा ब्यूगु दु।