स्वनिग:या त:धंगु नख: येँन्या: सुरु

सुथसिया ८ः०७ ताइलय्  यःसिँ थनेगु साइत

स्वनिग:या त:धंगु नख: येँन्या:  सुरु
फाइल किपाः


भदौ १४ - स्वनिग:या त:धंगु नख: येँन्या: थौं सुरु जुगु दु।

तर थुगुसिइ कोरोना भाइरसया संक्रमण फैले जुयाच्वंगुलिइ येँन्या:नख: छेँय् छेय् जक साधारण किसिमं न्याकिगु जुगु दु।  

थाै येँया हनुमानध्वाखाय् सुथय् य:सिँ थनेमा:गु दिं खः । सुथसिया ८ः०७ बजे  यःसिँ थनेगु साइत दुगु खः। यःसिँ थनिगु ठासय् साधारण पुजा जक जुइगु केन्द्रिय मानन्धर संघया गजेन्द्र मानन्धरं धयादिल। येँन्या: नख: शुरु जूगु चिं कथं येँया बसन्तपुरय् हनुमानध्वाखा अड्डाया प्रतिनिधि, कुमारीछेँया चिताइदार, गुथि संस्थानया पदाधिकारी व गुरुज्यूया पल्टनया उपस्थितिइ य:सिँ थनिगु परम्परा थुगुसिइ भंग जुगु  दु।

थ्वहे झ्वलय्, हनुमानध्वाखाय् थें यल, ख्वप किपू पन्ति नुवाकोट, मकवानपुर गढी, लिसें पुलांगु दरवार लागाय् नं य:सिँ थनेगु चलन दु। येँन्या: सुरु जूगु चिंकथं त्वा:त्वालय् नं यँमा:द्य: स्वनेगु याइ। न्हापा पालिजा:स्वां कायत व:म्ह ईन्द्रयात गथु छम्हसिनं ज्वना: चिनात:गु बाखंया आधारय् नेवा:तयसं येँन्या:बले त्वा:त्वालय् यँमा:द्य: थनिगु ख:।

येँन्या: नख:या झ्वलय् दशावतार प्याखं, द्य:प्याखं, भद्रकाली व लाखे प्याखं नं पिथनेगु चलन दु। य:सिँ थनेधुंका: कुमारी, भैरव व गणेशयात थ्यंमथ्यं स्वीताजिया अष्टमंगल मरि देछाइ। नानिचाया: क्वचायका: चान्हय् य:सिँ क्व:थला: येँन्या: नख: नं क्वचायेकिगु खः।

येँया नखया आकर्षणकथं पुलुकिसि, लाखे लिसें सव:भक्कु प्याखं नं थौंया दिनय् पिदनीगु खः। थौं न्यतं सव:भक्कु प्याखं, किलाघलं पुलुकिसि पिथनिगु खः।  न्हापा ईन्द्रं पालिजा: स्वां कायत भौक्यबय् थ: ऐरावत किसियात त्व:ता: किलाघ:या जंगलय् स्वां थ्व:व:गु बाखं दु। उबले गथु छम्हसिनं ईन्द्रयात ज्वना: चिनातसेंलि ईन्द्रयात मा-मां ऐरावत किसि उखेथुखे चा:ह्यूजूगु प्रतिककथं पुलुकिसि पिथनीगु खः। 

थ्वहे झ्वलय् थौया दिनय्  दच्छिया दुने मदुपिनिगु थथिति ल धुछि मत तया उपाकु वनिगु खः।

थुगुसिइ मनूत म्वः म्वः जुइगु छुं नं धार्मिक गतिविधि जुइमखु।