टोखाय् १५ शैय्याया आइसोलेशन केन्द्र सञ्चालनय्

टोखाय् १५ शैय्याया आइसोलेशन केन्द्र सञ्चालनय्


बैशाख २५ - टोखा नगरपालिकाय् अक्सिजनदुगु आइसोलेशन केन्द्र सञ्चालनय् वगु दु।

नगरपालिकां निगूगु चरणया कोरोना सङ्क्रमण अप्वसेलिं म्हिगःनिसें अक्सिजनसहितया आइसोलेशन केन्द्र सञ्चालनय् हगु खः। नगरपालिकाया उपप्रमुख ज्ञानमाया डङ्गोलं वडा ल्याः २ या टोखा प्राथमिक स्वास्थ्य केन्द्रय् अक्सिजनदुगु १५ श्ययाया आइसोलेशन सेन्टर निर्माण जूगु धयादिल । बिरामीया अवस्था स्वयाः स्वास्थ्य केन्द्रय् ५० श्ययाया आइसोलेशन केन्द्र निर्माण यायेगु उपप्रमुख डङ्गोलं धयादिल।

सो नगरपालिकां नगर उपप्रमुख डङ्गोलया कजिस्वीइ आइसोलेशन सेन्टर व्यवस्थापन तथा अनुगमन समिति निर्माण यानाः कोभिडया बिरामीया उपचारया लागि सम्भावित ठाय्या अध्ययन यानाःच्वंगु दु । अथेहे नगरपालिकां अप्वयाच्वंगु कोरोना सङ्क्रमितयात ध्यानय् तयाः अक्सिजन थेरापीनापंया आइसोलेशन केन्द्र निर्माण यायेत्यगु दु। नगरपालिकादुनेया जनप्रतिनिधि व कर्मचारीयात कोरोना सङ्क्रमण खनेदसेलिं वइगु वैशाख ३० गतेतकया लागि अत्यावश्यकबाहेक मेमेगु सेवा बन्द यानाःतगु दु ।

अथेहे उगु नगरपालिकां निगूगु चरणया कोरोनापाखें गम्भीर जूपिं  बिरामीया उपचारया लागि स्थानीय तहदुनेया निजी अस्पताललिसें सहकार्य याइगु जूगु दु ।

उपप्रमुखया गाडीइ नन कोभिड बिरामीयात:

नगर उपप्रमुख ज्ञानमाया डङ्गोलया गाडी नन कोभिड बिरामीयात ल्ह्येत ब्यूगु दु। देयन्यकं कोरोना सङ्क्रमित बिरामी अप्वसेलिं सरकारं निषेधाज्ञा जारी यायेधुक्कां अस्पताल वनेत थाकुपिं बिरामी ल्हयेत उपमेयरया गाडी प्रयोग यायेत ब्यूगु खः।

नगर उपप्रमुख डङ्गोलं डाइलोसिस, डेलिभरीलगायतया अत्यावश्यक बिरामीयात छेँय् नं अस्पताल यंकेत व अस्पतालं छेँय् हयेत म्हिगःनिसें थम्ह प्रयोग यानाच्वंगु गाडी बियागु धयादिल ।