आदिवासी चलचित्र अवार्ड जा मनः गुभाजुं त्याकल

आदिवासी चलचित्र अवार्ड जा मनः गुभाजुं त्याकल


भदौ ८ - नेवाः भाय्या संकिपा जा मनः गुभाजुं नेपाल आदिवासी चलचित्र (निफ) अवार्ड त्याकूगु दु। अमेरिकाया न्युयोर्कय् २ न्हूतक जूगु स्वकःगू नेपाल आदिवासी चलचित्र महोत्सवय् ब्वतिकाःगु थीथी भाय्या ७ गू संकिपा मध्ये जा मनः गुभाजुं उत्कृष्ट आदिवासी चलचित्र अवार्डलिसें १,१११ डलर नगद सिरपा त्याकूगु खः । नेपाल आदिवासी जनजाति महासंघ अमेरिकाया अध्यक्ष लोक चेम्जोङ व न्युयोर्कय् दूगु नेपाली महाबाणिज्य दूत विष्णुप्रसाद गौतमं मंकाः कथं जा मनः गुभाजया निर्देशक रवी साय्मीयात सिरपा लःल्हानादिगु खः।

आइतबाः बहनी लिबाक्कतक जूगु अवार्ड वितरण समारोहलय् उत्कृष्ट संकिपाःनापं थीथी १० विधाय् सिरपा लःल्हागु खः। नेवाः संकिपाः जा मनः गुभाजुं उत्कृष्ट पटकथा (सुशील राजोपाध्याय्) व उत्कृष्ट अभिनेता (सुशील राजोपाध्याय्) काःगु खः। अथेहे उत्कृष्ट नायिकाय् मगरभाय्या संकिपाःल् ट्याङचालकया नायिका तिला मगरं अवार्ड त्याकादिगु खसाः लिम्बु जातिया के संकिपां उत्कृष्ट बाखं, ह्योल्मो जातिया मेटोकं उत्कृष्ट छायाँकन व दर्शक रोजाईया सिरपा काःगु खः। अथेहे तामाङ जातिया प्रङ्ना संकिपायात उत्कृष्ट भेषभुषा सिरपा व गुरुङ जातिया संकिपा मि होर्वै टं उत्कृष्ट संगीत व उत्कृष्ट निर्देशनया अवार्ड काःगु खः।

२७ क्वःगु विश्व आदिवासी दिवसया झ्वलय् नेपाल आदिवासी जनजाति महासंघ (फिप्ना) अमेरिकां आदिवासी जनजातिया भाषा, भेषभुषा, संस्कृतिया संरक्षण व संवद्र्धनय् ग्वाहालि यायेगु उद्धेश्यं महोत्सव यानागु धागु दु।