जनकवि दुर्गालाल श्रेष्ठया जीवनी २०७८ साल दुने पिहाँवइगु

जनकवि दुर्गालाल श्रेष्ठया जीवनी  २०७८ साल दुने पिहाँवइगु


साउन २१ - जनकवि दुर्गालाल श्रेष्ठया जीवनी कवि कथा २०७८ साल दुने पिहाँवइगु जूगु दु। श्री दुर्गालाल साहित्य प्रतिष्ठानं २०७८ साल दुने नेपाली भासं वय्कया जीवनी ‘कवि कथा’ पिकायेगु घोषणा याःगु खः।

आर. मानन्धरं च्वयादिगु, राजेन्द्र महर्जनं सम्पादन यानादिगु कवि कथाया ज्या अन्तिम चरणय् थ्यंगु प्रतिष्ठानं धागु दु। प्रतिष्ठानया कथं उगु कृति चित्रमय जुइ।

नेपालभाषां वय्कया जीवनीया सफू निदँ न्हय् (ने. सं. ११३९) हे पिहाँवयेधुक्कुंगु दु। अमेरिका व बेलायतय् दुगु नेवाः संगठनतय्गु ग्वाहालि पिहाँवगु उगु सफूया डिजाइनर रविन साय्मि जुयादिइसाः सफूया पितब्वज्या कोरोना भाइरसया संक्रमणया जोखिमया कारण तःगु लकडाउनया कारण स्थगित जुयाच्वंगु दु।

परिस्थिति अनुकुल जुसाः निगुलिं भाय्या सफू छक्कंल विमोचन यायेगु योजना दुगु प्रतिष्ठानं धागु दु ।

जनकवि श्रेष्ठया जन्म दिलागाः एकादशी खुन्हू जुगु खसाः म्हिगः वय्क ८७ दँ क्यनादिगु खः। थ्वहे लसताय् वय्कया जीवनी खँय् भाषं पिहावयेत्यगु जानकारी प्रतिष्ठानं ब्यूगु खः।