जनबहा:द्य:यात थथे याना निभाः पाकातल (फोटो फिचर)

जनबहा:द्य:यात थथे याना निभाः पाकातल (फोटो फिचर)


माघ ११ - सहकाल व करूणाया प्रतिक कथं कयातःम्ह येँया जनबहाःद्यःयात निभा पाकेगु ज्याः शुरू जुगु दु।

जनबहा:द्य:या रथजात्राया लागिं दँयदँसं पोहेलाथ्व अष्टमीखुनु जनबहा:द्य:यात न्हवं याना नवमीनिसें निभा: पाकिगु खः।

द्यःयात निभा पाकिगु धकाः  जात्राया लागि लँपु छीगु लिसें द्यःयात न्हूधा: याइगु खः। थथे द्यःयात निभा पाकिबलय् जनबहा:द्य:लिसें सप्तलोचन तारा व आर्यताराया मूर्तियात नं न्हूधाः याइगु खः।थुगुसिइ माघ ८ गते द्यःयात न्हवं यागु खः । 

थुगुसिइ पुजारी दीपंकर शाक्य व प्रेम रत्न शाक्यं न्हवं यानादिगु खसाः वयकपिन्सं हे माघ ९ गते निसें द्यःतयगु लँपु छिइगुलिसें न्हूधाः यानाच्वनादिगु दु। वयकपिन्त रंग तयेगु लागि नरेन्द्र चित्रकारं ग्वाहालि यानाच्वनादिगु दु। थथे द्यःयात निभा पाकिबलय् बालाक्क निभा त्वइमखु धइगु जनविश्वास दु।

द्यःतयत न्हूधाः याना पून्हि खुन्हू न्हूगु लं फिका, दृश्टि कंका, दशकर्म याना पुजा याना हाकनं देगलय् तुं विज्याकिइ, चान्हय् होम याइ। स्वनिग:या प्यम्ह करूणामयमध्ये छम्ह जनबहा:द्य:या रथजात्रा धा:सा चौलाथ्व अष्टमी खुनुंनिसें सुरु जुइ।