कर्मराज महाविहार, द्य:छेँय् लिसें बुद्धाचार्य पुजारीया छेँय् सम्वन्धितयात लःल्हात

कर्मराज महाविहार, द्य:छेँय् लिसें बुद्धाचार्य पुजारीया छेँय्  सम्वन्धितयात लःल्हात


बैशाख १४ -  २०७२ सालया भ्वखाचं ध्वस्त जूगु येँया स्वयम्भुया बुद्धचार्य पुजारीतयगु १७ छेँय् , क्वाःपा द्य:छेँय् व कर्मराज महाविहार बौद्ध गुम्बाया निर्माण क्वचायेकाः सम्वन्धितयात लःल्हायेगु ज्या जूगु दु। म्हिगः स्वयम्भू पुननिर्माण समितिइ स्वयम्भूइ याःगु ज्याझ्वलय् सांसद जीवनराम श्रेष्ठं संरचनातयगु उलेज्या याना छेँय्या नक्सा व सम्बन्धित भ्वँ बुद्धाचार्य परिवार व महाविहारयात  लःल्हानादिगु खः।

ज्याझ्वलय् सांसद श्रेष्ठं थ्व नमुना ज्या जूगु धासें भ्वखाचं क्षति जूगु चुकः, बहाःया छेँय् नं थथे हाउस पुलिंग योजना दयेकाः दनेफइगु धयादिल ।

ज्याझ्वलय् येँय् महानगरपालिका मेयर विद्या सुन्दर शाक्य, पुरातत्व विभागया पुर्ब महानिर्देशक भेषनारायण दाहाल, महानगरया उपमेयर हरिप्रभा खड्गी, बिहारया लामागुरूतयसं थःथःगु धारणा तयादिगु खः। येँय् महानगरपालिकाया प्रवक्तालिसें वडा १५ या अध्यक्ष नं जुयादिम्ह  समितिया अध्यक्ष ईश्वरमान डंगोलया सभापतित्व जूगु ज्याझ्वः समितिया सदस्य निमा घ्याम्छों सन्चालन यानादिगु खः।

थुपिं संरचनाया पुनर्निर्माण यायेत महानगरया कार्यपालिका बैठकं २ दँ न्हय्  स्वयम्भू पुननिर्माण समिति गठन याःगु खः। छेँय्तयत एकीकरण याना, हाउस पुलिङ् प्रणालीपाखें निर्माण याःगु खः।येँय् महानगरपालिकां पुरातत्व विभागलिसेंया समन्वयलय् छेँय्यात छगु हे शैलीइ तयार याःगु खः। उगु छेँय्त मिइमदइ व खाली पुस्ताय् जक  हक हस्तान्तरण जुइगु व थुपिं छेँय्तयत एकीकरण यानाः महानगरं छगु हे भवनया नक्सा स्वीकृत याःगु खः।  पुननिर्माणया लागि १५ करोड तकाति लागत तुइगु अनुमान याःगु खः। गुकिइ मध्ये १३ करोड ५२ लाख तकाय् पुननिर्माण सम्पन्न जुइगु चरणय् थ्यगु खः। उगु लागतमध्ये ३० प्रतिशत छेँय् थुवां न ल्यदनिगु १७ अवतारी गुरु कर्मपा थिन्ले थाय दोर्जें तयादिगु खः।