स्वास्थ्य मापदण्ड पालना याना बराह प्याखं क्यन (फोटो फिचर)

स्वास्थ्य मापदण्ड पालना याना बराह प्याखं क्यन (फोटो फिचर)
@krmaharjan


मंसिर १३ - यलया एतिहासिक कात्ति प्याखंअन्तर्गतया बराह प्याखं कोरोना भाइरसया महामारीया कारणं  स्वास्थ्य मापदण्ड पालना याना क्यंगु दु।

थगुने नगुने १२ न्हूतक क्यंगु कात्ति प्याखं थुगुसिइ कोरोना महामारीया कारण सरकारं क्वःछिनातगु स्वास्थ्य मापदण्ड पालना याना शुक्रबाः क्यगु खः। 

मास्कलिसें भाइजर अर्थात् ‘फेस शिल्ड’, पञ्जा, स्यानिटाइजर, भाैतिक दूरी कायम याना बराह प्याखं क्यंगु खः। शुक्रबाः नारान्द्यवं वराह अवतार कया: दैत्यराज हिरण्याक्षयात स्या:गु लू क्यंगु ख:।

३७९ दँ न्हय् निसें मदिक्क क्यनावयाच्वगुलिइ परम्परायात कायम यायेत थुगुसिइ कोरोनाया जोखिमया दथुइ थुगु प्याखं २ न्हू जुसाः नं क्यनेगु निर्णय जुगु खः ।

प्याखं शुरू जुइन्हय् यल महानगरपालिकाया वडा ल्याः १६ पाखें वडा अध्यक्ष निर्मलरत्न शाक्यं बराहया मतु व अक्षयकोष स्थापनार्थ १० लख तकाया चेक कार्तिक नाच संरक्षण समितिया अध्यक्ष किरण चित्रकारयात लःल्हानादिगु खः।  

यल लायकुयात सिल याना मजिमगाःपिं कलाकार जक च्वना नेपालमण्डल टेलिभिजन, नेपालमण्डल टेलिभिजनया अफिसियल फेसबुक पेज व यूट्यूब, कात्तिक नाच संरक्षण समितिपाखें संचालन यानाच्वंगु झीगु कार्तिक नाच फेसबुक पेजपाखें प्याखं क्यनेगु व्यवस्था याःगु खः।

नेपाल सम्वत् ७६१ (विसं १६९७) यलया जुजु सिद्धिनरसिंह मल्लं देश व जनताया कल्याणार्थ उगु प्याखं न्ह्याकादिगु खः। अबलेनिसें थुगु प्याखं मदिक्क न्ह्यानावयाच्वंगु खः।