स्वनिगः दुहाँवइगु नाका सिल यायेत सरकारयात येँय् महानगरया इनाप

स्वनिगः दुहाँवइगु नाका सिल यायेत सरकारयात येँय् महानगरया इनाप


जेठ ५ - सरकारं जारी यानातःगु लकडाउनया ईलय् नं  स्वनिगः पिने मनूत दुहाँवयाच्वंगुलिइ नाका सिल यायेत नेपाल सरकारयात येँय् महानगरपालिकां इनाप यागु दु। महानगरपालिकाया म्हिगः च्वंगु ४६ क्वःगु विशेष बैठकं नाका सिल यायेत सरकारयात इनाप यायेगु निर्णय जुगु धकाः महानगरं विज्ञप्ति पिकया जानकारी बिउगु खः।

महानगरया प्रवक्ता इश्वरमान डंगोलया ल्हाचिं दुगु विज्ञप्तिइ कोरोना संक्रमण रोकथाम व नियन्त्रणया लागिं सरकारं जारी यानातःगु लकडाउनया ईलय् न  स्वनिगलय् दुहाँवइगु नाकाय् मजिमगाःगु सेवाया निंतिं जारी यानातःगु सवारी साधन व पास दुरुपयोग याना मनुत  दुहाँवयाच्वंगुलिइ  संक्रमणया खतरा झन अप्वःगु धासें लकडाउन ज्वछि दक्वं नाका सिल यायेत नेपाल सरकार, गृह मन्त्रालय व जिल्ला प्रशासन ज्याकुयात  इनाप यायेगु निर्णय जुगु धकाः न्हयथनातगु दु ।

अथेहे लकडानउनया ईलय् सुं नं मजिमगाःगु ज्याया लागिं स्वनिगलय् वयेमाःसा प्रस्थान बिन्दुइ हे वयात संक्रमण मदुगु पुष्टि जुइगु दसिपौ घाका छ्वया हयेगु व्यवस्था यायेत न सरकारयात इनाप यानातगु दु ।नेपाल सरकारं जारी यागु कोेरोना भाइरस सम्बन्धी क्वारेन्टाइन सञ्चालन लिसें व्यवस्थापन यायेत दयेकुगु मापदण्ड, २०७६ कथं थःगु क्षेत्रय् आवश्यक ल्याँखय् क्वारेन्टाइन सञ्चालन व व्यवस्थापन यायेत लिसें माःकथंया सःशुल्क क्वारेन्टाइन न  सञ्चालनया व्यवस्था यायेत इनाप यानातःगु दु । 

अथेहे मजिमगाःगु सार्वजनिक सेवाय् दुपिं जनप्रनिधि, कर्मचारी, स्वास्थ्यकर्मी, सञ्चारकर्मी, सुरक्षाकर्मी व स्वयमसेवकपिन्त निःशुल्क व सर्वसाधारणया लागिं निःशुल्क व सशुल्क जुसा दंकः कोरोना भाइरस सम्बन्धी परीक्षणया व्यवस्था यायेत नं सरकारयात इनाप यायगु बैठकं निर्णय याःगु दु। 

विज्ञप्तिइ स्वनिगलय् दुहाँ वइपिनिगु पालिका, वडा, त्वाः, स्वापू नं. व छेँय् थुवाया नां दुगु विवरण महानगरया सम्वन्धित वडा ज्याकुयात उपलब्ध याकेत जिल्ला प्रशासन ज्याकुयात इनाप यायेगु खँ न्ह्यथना तःगु दु ।

लक डाउनया श्रमदानय् आधारित राहत ग्वाहालि यायेगु कार्यविधि तयार यायेगु, खुइगु घटना, घरेलु हिंसा, मानसिक ल्वय् थेंज्यागु सामाजिक समस्याया सम्भावना ब्वलनेफुगुलिं उकियात पनेत सुरक्षा निकायया भूमिका व सक्रियता प्रभावकारी यायेत गृह मन्त्रालययात इनाप यायेगु धागु दु।

लकडाउन ज्वछि न्हिया न्हिथं माःगु नसाज्वंलया आपूर्ति व्यवस्था सहज दयेकेत थःगु क्षेत्र दुने वासः, ग्यास व त्वनेगु लंया  पसः वाहेक मेगु नसाज्वलं, फलफूल व तरकारी पसः न्हिया न्हिथं  सुथय् १० बजेतक्क सञ्चालन याकेत आवश्यक समन्वय सम्वन्धित निकायपाखें यायेगु व वडा समितिं लकडाउन  ज्वछि विदेश वा स्वनिगः पिनें थःगु वडाय् च्वंवपिं मनूतयगु विवरण मुंकेगु व निगरानी यायेगु , स्वास्थ्य परीक्षणया विवरण अद्यावधिक यायेगु व उकि सम्बन्धी एकीकृत विवरण वडा ज्याकुपाखें प्रशासन विभागय् दुतिनेगु लिसें संक्रमण रोकथाम व नियन्त्रणया लागिं महानगरपाखें जुगु ज्याया अनुगमन याना उकिया प्रतिवेदन नियमित रुपं प्रमुखसमक्ष पेश यायेत नं महानगरं अनुगमन समितियात निर्देशन बिइगु  धकाः विज्ञप्तिइ धयातगु दु ।