नेपालमण्डल टेलिभिजनया अध्यक्ष रमेश महर्जनया अन्तिम संस्कार क्वःचाल

नेपालमण्डल टेलिभिजनया अध्यक्ष रमेश महर्जनया अन्तिम संस्कार क्वःचाल


कार्तिक २ - नेपालमण्डल टेलिभिजनया अध्यक्ष रमेश महर्जनया अन्तिम संस्कार मंगलबाः जूगु दु। वय्कया अन्तिम संस्कार  सुथय् पशुपति दिपय् जूगु खः।

मदुम्ह महर्जनया अन्तिम संस्कारया झ्वलय् नेपाःया थीथी क्षेत्रयापिं व्यक्तित्वपिनिगु ख्वाःतुक्क उपस्थिति दुगु खः।वय्कयात वय्कःया काय् रिकेन महर्जनं मिँ तयादीगु खः ।

अन्तिम संस्कारया लागि पशुपतिइ यंकेन्हय् यलया भैसेपाटी च्वंगु मेडिसिटि अस्पतालं वयकया सिम्ह वय्कया छेँय् भैसेपाटी यंकूगु खः।

नेपाल सुनचाँदी तथा रत्न आभूषण महासंघया अध्यक्ष नं जुयादिइ महर्जन ५६ दँया बैशय् म्हिगः मदुगु खः । छवाः न्हय् कोभिड संक्रमण खनेदसेलिं अस्पताल भर्ना जुयादिम्ह महर्जन सोमबाः न्हिनय् मेडिसिटी अस्पतालय् मदुगु खः।

न्हूदँ समारोह समितिया ११४० व ११४१ या नाय् नं जुयादीम्ह वय्क विवेकशील साझा पार्टीया नेता जुयादिइ । आरबी डायमन्ड ज्वेलर्सया अध्यक्ष महर्जन नेपाल श्रीलंका उद्योग वाणिज्य संघया अध्यक्ष नं जुयादिइ। नेपाल चेम्बर अफ कमर्शका कार्यकारिणी सदस्य वय्क ज्यापू समाज यलया सल्लाहाकार समितिया दुज नं जुयादिइ।

समाजसेवा व राजनीति लगायय् उतिकं क्रियाशिल वय्क नेपाःया छम्ह प्रतिष्ठित व्यवसायी जुयादिइ । वय्कया जहाननापं २ म्ह्याय् व छम्ह काय् दिइ।