३७ दँ न्हय् यलं खुया यंकुगु लक्ष्मीनारायणया मूर्ति पाटन संग्रहालययात जिम्मा बिल

३७ दँ न्हय् यलं खुया यंकुगु लक्ष्मीनारायणया मूर्ति  पाटन संग्रहालययात जिम्मा बिल


बैशाख २ -  नेपालं खुया यंकाः अमेरिका थ्यंगु द्यःतयगु मूर्ति नेपाः लितहगु दु। अमेरिकाया डालस थ्यकुगु यलया बहुमूल्य लक्ष्मी–नारायण मूर्ति बिहीबाः येँय् हयाः सार्वजनिक याःगु खः। यलया पटको त्वालय् च्वंगु लक्ष्मीनारायण देगलय्  सन् १९८४ य् तंगु लक्ष्मीनारायण (वासुदेव कमलाजा) या मूर्ति बिहीबाः सार्वजनिक याःगु खः।

लक्ष्मी नारायणया मूर्ति पुरातत्व विभागं जिम्मा कागु दुसाः सुरक्षितनापं तयेत पाटन संग्रहालयलय् छ्वगु खः । बिहीबाः पुरातत्व बिभागय् जूगु ज्याझ्वलय्  संस्कृति पर्यटन तथा नागरिक उड्ययन मन्त्रालयया सचिव यादव प्रसाद कोईरालाया उपस्थितिइ बिभागं मुर्तिया जिम्मा कागु खः ।

संस्कृति पर्यटन तथा नागरिक उड्ययन मन्त्रालयया सचिव कोईरालां यक्व मेहनतलिपा बिदेशय् दुगु मूर्ति नेपाल हयेत तालागु धयादिल ।

अमेरिकी दूतावास, अमेरिकी कूटनीतिक सेवाअन्तर्गतया विदेश अपराध अनुसन्धान वइगु ज्याकु, नेपाल प्रहरी, एफबिआई व डल्लास म्युजियम अफ आर्टया मंकाः अनुसन्धानलिपा लक्ष्मी–नारायणया मूर्ति लुगु खः । अमेरिकाया टेक्सास राज्यया डल्लास म्युजियम अफ आर्टय् २०७७ साल मंसिरय् लुगु मूर्ति यलया पट्को त्वालय् दुगु नारायण देगलय् तंगु खः ।

सन् १९८४ य् तनेन्हय् यलय् उगु मूर्तिया पूजा जुइगु यल महानगरया प्रमुख चिरिबाबु महर्जनं धयादिल।

करीब ८०० निसें द्वोछि दँ न्हय्  स्थापना याःगु मूर्तिया जवःपाखेंया बच्छि ब्वय् नारायणया आकृति दुसाः देपाःपाखेंया बच्छि ब्वय् लक्ष्मीया आकृति दु। जवपाखेंया तुति क्वय् नारायणया वाहाः गरुड दुसाः देपापाखेंया तुति क्वय्  लक्ष्मीया वाहाः काउली तयातगु दु। मुर्ति ७० किलोया दु । मध्यकालिन नेपाली मूर्तिकलाया नमूनाया रुपय् दुगु व प्रस्तरं दयेकाःतगु मुक्ति १५ गू शताव्दीया जूगु धागु दु ।

सन् १९८४ य् उगु मूर्ति देगलं खुया यंकुल। लिपा अमेरिकाय् खनेदत। मूल्यवान् मूर्ति व कलाकृति लिलाम याइगु अन्तर्राष्ट्रिय संस्था सदबिजं सन् १९९० य्  थःगु ‘क्याटलग’ य् लक्ष्मीनारायणया मूर्ति ३०–४० द्वः अमेरिकी डलरय् मिइत तयार जूगु जानकारी पितबिल। मूर्ति मिल, अनं गन थ्यन छुं हे सिइमन्त। लिपाः सन् २०१० य् पटको त्वाःया दिलेन्द्र श्रेष्ठं ‘डालस म्यूजियम अफ आर्ट’ य् थ्यःबलय् वयकलं थःगु ठाय्या मूर्ति अन खंकादिगु खः।

लक्ष्मीनारायणया मूर्ति स्वतन्त्र अध्येता, अमेरिकी गुप्तचर संस्था ‘एफबीआई’ लिसें नेपाल सरकारया पहलय् वंगु चैत ३१ य् त्रिभुवन अन्तर्राष्ट्रिय विमानस्थलय् थ्यकवंगु खसाः वया न्हय् २०७७ साल फागुनय्  अमेरिकी सरकारं नेपाः सरकारयात लल्हागु खः। 

बिहिबाः जूगु मूर्ति सावर्जनिक याःगु ज्याझ्वलय् पुरातत्व विभागया पदाधिकारीत, नेपाःया लागि अमेरिकी दूतावासया प्रतिनिधि, पाटन संग्रहालयलया प्रतिनिधि,यल महानगरया पदाधिकारी लगायतया उपस्थिति दुगु खः।