येँय्या ८ स्थानीय तहलय् स्थानीय पाठ्यक्रम, ३ तहलय् ल्यदनिगु

येँय्या ८ स्थानीय तहलय् स्थानीय पाठ्यक्रम, ३ तहलय् ल्यदनिगु


भदाै १६ - येँय् जिल्लाया ११ स्थानीय तहमध्ये ३ गुलिं अझं नं स्थानीय पाठ्क्रम लागू मयानिइ।

संविधानं हे आधारभूत तहलय् छगू विषयया पाठ्यक्रम लागू यायेगु भाला स्थानीय तहयात ब्यूगु दु। उकिं नं गूगु भाय्  ल्ययेगु, छु विषयवस्तुयात दुथ्याकेगु, गबलेंनिसें ब्वकेज्या सुरु यायेगु धइगु फुक्कं अधिकार स्थानीय तहयात बियातसाः नं येँय् जिल्लाया नागार्जुन, टोखा व कीपू नगरपालिकां अझं नं लागू मयानिइ।

सुरु याये ल्यदनिगु २ स्थानीय तहं नागर्जुन व टोखां थ्वहे शैक्षिक सत्रनिसें लागू यायेगु यानाः व्यवस्था जुयाच्वगु धागु दुसाः कीपू नगरपालिकां कोरोना महामारी कम जुलकि सुरु यायेगु धागु दु। ल्यदनिगु मेगु ८ स्थानीय तहं ब्वकेधुक्कुंगु दु। आःतक लागू याःगुमध्ये यक्वसियां नेपाली भाय्यात ल्यगु दु।

येँय् महानगरपालिका व कीपू नगरपालिकां धासाः नेपाल भाषा ल्यगु दु। गोकर्णेश्वर नगरपालिकां दकलें न्हापा ३ दँ न्हय् हे थःगु पाठ्क्रम तयार याना ब्वकेधुक्कुंगु दु। अनंलिपा येँय् महानगरापालिका, चन्द्रागिरि, शङ्खरापुर, दक्षिणकाली, कागेश्वरी मनोहरा, गोकर्णेश्वर व बूढानीलकण्ठ नगरपालिकाय् ब्वकेज्या शुरू जूगु खः।

नेपाःया संविधानया भाग ३ या मौलिक हकअन्तर्गत धारा ३२ या उपधारा (२) व (३) य् देय्या हरेक स्थानीय तहपाखें थः मातहत दुगु सामुदायिक व संस्थागत स्कूलय् स्थानीय पाठ्यक्रमया रूपय् थःम्ह  हे १०० पूर्णाङ्कया छगू विषय अध्ययन–अध्यापन याकेफइगु व्यवस्था याःगु दु।

येँय् महानगरं वंगु शैक्षिक सत्रनिसें नेपाल भाषं ब्वकेज्या शुरू सुरु याःगु दु। येँय्या मेगु स्थानीय तहं पुलापिं स्यमिपाखें स्थानीय विषययात ब्वकाच्वगु दुसाः येँय् महानगरं थःगु हे साधन व स्रोतय् स्यमिया दरबन्दी सृजना यानाः स्कूललय् छ्वगु खः।

थःथःगु स्थानीय तहलय् दुगु ऐतिहासिक सम्पदाया पहिचान याकाः उकियात संरक्षणय् न्हूगु पुस्तायात जिम्मेवार यायेगु उद्देश्यनापं पाठ्यक्रम लागू यानागु धकाः शङ्खरापुर नगरपालिकाया प्रमुख सुवर्ण श्रेष्ठं धयादिल।

केन्द्रपाखें दयेकिगु पाठ्यक्रमं स्थानीय संस्कृति, जनजीवन, भूगोललगायत पक्षयात दुथ्याकेफैमखु धइगु मान्यताया आधारय् स्थानीय पाठ्यक्रमया अवधारणा वगु खः । अथेहे राष्ट्रिय पाठ्यक्रम प्रारुप २०७६ नं १ तगिंनिसें ८ तक स्थानीय विषय ब्वकेफइगु प्रावधान तःगु दु।