यलय् मानमानेश्वरी भवानीयात मूःचुकय् विज्याकल

यलय् मानमानेश्वरी भवानीयात मूःचुकय् विज्याकल


असोज २६ - यलय् लिच्छवीकालिन मानमानेश्वरी भवानी मूछेँय् माजुयात मुछेँ आँगमं मूःचुकय् विज्याकूगु दु।  थाैं मंगलबाः काैलाथ्व सप्तमीखुन्हू मूछेँय् माजुयात मुछेँ आँगमं मूचुकय् विज्याकूगु खः। थ्वलिसें यलय् पायाः जात्रा शुरू जूगु दु।

थुगुसिइ यल महानगरपालिकां जात्राय् सहभागीतयगु बिमा याःगु दु। ललितपुर महानगर प्रमुख चिरीबाबु महर्जनं महानगरं थ्व जात्राया लागि २५ लख तकाया अक्षयकोष नं स्थापना याःगु धासें जात्राय् सहभागीतय्गु महानगरं बिमा याःगु धयादिल। 

मूछेँय् माजुयात मुछेँ आँगमं मूःचुकय् विज्याकूगु इलय् यल महानगरपालिकाया मेयर महर्जन, ललितपुर उद्योग वाणिज्य संघया नाय् मनोज बहादुर न्याछँय्, आँगंमं गुथिया गुथियारत लगायतया उपस्थिति दुगु खः।थुगुसिइ पायाः जात्राय् स्वम्हसियां खड्ग ज्वनिगु आगमं गुथिया गुथियार उद्धव आचार्यंं धयादिल। 

जात्राया झ्वलय् नवमी खुन्हू थसिख्यःया महालक्ष्मीस्थानं थमिमल पायाः पिहाँवइसाः दशमी खुन्हू ठेचोया नवदुर्गा द्यः मानमानेश्वरी माजुया ठासय् सिन्ह तिइत यल लाकुलिइ विज्याइ। त्रियोदशी खुन्हू मानमानेश्वरी भवानीयात मूचुकं मुछेँ आँगमचोकय् विज्याकिइ।

थ्व जात्रा २०५० साल लिपानिसें थीथी कारणं दिनाच्वगुलिं २०७५ सालय् यल महानगरपालिका, ललितपुर उद्योग वाणिज्या संघ, गुथि संस्थान, गुथियारतय्गु पहलय् पायाः जात्रा न्ह्यागू खः ।