‘माउण्ट एभरेष्ट फेशन रनवे’ या निगूगु संस्करण असोजय् जुइगु

‘माउण्ट एभरेष्ट फेशन रनवे’ या निगूगु संस्करण असोजय् जुइगु


साउन ५ - नेपाल पर्यटन बोर्डया प्रवर्द्धनय् हलिंया दकलें तजाःगु ठासय् ‘माउण्ट एभरेष्ट फेशन रनवे’ या निगूगु संस्करण जुइगु जूगु दु।

नेपाःनापं हलिंया थीथी देय्या सेलिब्रेटी मोडलतयसं ब्वति काइगु फेसन शो वइगु असोज ६ गते (२२ सेप्टेम्बर २०२१) य् जुइगु सोमबाः येँय् जूगु पत्रकार सम्मेलनं जानकारी ब्यूगु खः। फेसन शो सगरमाथा कालापत्थर क्षेत्रय् जुइ।

के फिल्मस् व एमई टू फिल्मस्‌या सहकार्यमय् ज्याझ्वः जुइत्यगु खः। फेशन रन वे या न्ह्पांगु संस्करण नगुने २०७६ पुस—माघय् जूगु खः। अबलें थ्व ज्याझ्वलं ‘गिनिज बुक अफ वर्ल्ड रेकर्ड’ पाखें विश्व कीर्तिमानया उपाधि प्राप्त याःगु खः। थुगुसिइ नं ज्याझ्वःयात गिनिज बुक अफ वर्ल्ड रेकर्डय्  रेर्कड याकेगु ग्वसाखलया योजना दु ।  थ्व ज्याझ्वःया अतिरिक्त  सहभागी २०० म्हसियां नं व्यक्तिगत रुपय् वर्ल्ड रेकर्ड दर्ता याकेत्यगु दु।

ज्याझ्वःयाबारे जानकारी बिइत जूगु पत्रकार सम्मेलनय् पर्यटन बोर्डया कार्यकारी प्रमुख डा. धनन्जय रेग्मीइ नेपाःया हिमाल, पहाड व तराईया पर्यटन प्रर्वद्धनया लागि बोर्डं बिस्कं बिस्कं योजना हःगु सन्दर्भय् थ्व ज्याझ्वलं नेपाःया पर्यतीय पर्यटनय् न्हूगु आयाम थप याइगु धयादिल। वय्कलं  विश्वसमुदायं नेपाःयात मौसमी (सिजनल) पर्यटकीय गन्त्वयया रूपय्  थुइकिगु धासें असोजय् याइगु ज्याझ्वलं नेपाल फुक्कं उमेर समूह व फुक्कं सिजनया पर्यटकीय गन्तव्य  खः धकाः सन्देश बिइगु धयादिल । वय्कलं  कोभिडया कारण पर्यटकीय गतिविधि जुइमफयाच्वंगु अवस्थाय् बोर्डं अवस्था सहज जुइसातकि प्रवर्द्धनया मेमेगु ज्यायात नं निरन्तरता बिइगु धयादिल ।

ज्याझ्वलय् ग्लोबल आईएमई बैकया सिइओ रत्नराज बज्राचार्यं थज्याःगु ज्याझ्वलं नेपाःया पर्यटनयात अन्तरराष्ट्रिय समुदायलय् म्हसिकेत थप ग्वाहालि जुइगु धयादिल।

के फिल्मसका प्रमुख कार्यकारी अधिकृत पङ्कज के गुप्तां हलिंमय् दकलें उचाइलय् जुइगु ज्याझ्वलय् दिगो पर्यटनया अवधारणायात आत्मसात याःगु व थुकिं विश्वया ध्यान सालिइ धयदिल ।

कम्पनीया सीओओ लिसें फेसन डिजाइनर रमिला नेम्कुलं थ्वः ज्याझ्वः नेपाःया गौरव जुगु व थुकिं नेपाःया मौलिक वसःत मागु कथं परिमार्जनं याना न्हयब्वय्गु धयादिल । 

अथेहे कम्पनीया सीएफओ रिकेन महर्जनं दीगो पर्यटनया लागि थपिन्सं थज्याःगु ज्याझ्वः यायेत्यनागु जानकारी बियादिल ।

अथेहे नेपाल सुनचाँदी रत्न तथा आभुषण महासंघया अध्यक्ष लिसें नेपालमण्डल टेलिभिजनया अध्यक्ष रमेश महर्जन व वय्कया जहान सरिता महर्जनं आरबी डायमण्डं सिरपा त्याकुम्हसियां पुनिगु लुँ व वह ल्वाकछ्याना दयेका तःगु डेढ किलों मल्याकं दुगु मतुया अनावरण यानादिगु खः।

फेसन शो ज्याझ्वःयात भारतया एमई टू फिल्मस्‌या सञ्चालकलिसें रियालिटी शो निर्देशक श्रुती आनन्दिता बर्मा व अमिताभ एस बर्मां निर्देशन यानादिइसाः ज्याझ्वःया हस्पिट्यालीटी  पार्टनर सोल्टि होटलयात व बैङकींङ पार्टनर ग्लोबल आइएमई बैंकयात तयातगु दु। ज्याझ्वःया जनसम्पर्क अप्वयेकेगु भाला मिलानया बिश्वबिख्यात फेसन शोया पीआर  क्रीश इगरं काःगु दु ।

पत्रकार सम्मेलनय् ज्याझ्वःया फस्ट लुक, टिजर सार्वजनिक याःगु खः।