जित ख्वय्का छ वने फइ मखुया म्युजिक भिडियो पिदन

जित ख्वय्का छ वने फइ मखुया म्युजिक भिडियो पिदन


असार ५ - नेपालभाषाया म्ये जित ख्वय्का छ वने फइ मखु या म्युजिक भिडियो पिदंगु दु। ज्ञानमाला भजन गुरु लिसें आधुनिक म्येया म्येहालामी, रचनाकार, कलाकार मदुम्ह पद्मज्योति बज्राचार्यं लसय् हनादिगु जित ख्वय्का छ वने फइ मखु या म्युजिक भिडियो शनिवाः भर्चुयल ज्याझ्वःया दथुई पिदंगु खः।

नेपालभाषा लिसें खस भाय्या भजन व आधुनिक म्ये हाला दिम्ह बिष्णु माया ब्यञ्जनकारं हाला दिगु थुगु म्येया म्युजिक भिडियोलय् सञ्चारकःमी अनुप शाक्य,  रोजिना सुवाल लिसें सुष्मा बज्राचार्यं म्हितादिगु दु। थुगु म्येया ओरिजिनल भर्सन मदुम्ह पद्मज्योति बज्राचार्यं हालादिगु खः ।

मिसा, आसाकुति, वान वे, ग्वाज्यः लगायतया संकिपा व म्युजिक भिडियोलय् अभिनय लिसें निर्देशन याना दिम्ह सुरज नापितं थुगु म्युजिक भिडियोया निर्देशन याना दिगु खः। मदुम्ह मन्त बज्रं च्वया दिगु थुगु म्येया म्युजिक भिडियोया बाखं सत्य घटनाय् आधारित जुगु निर्देशक सुरज नापितं धयादिल।

फम्पि, च्वबहाः, जलदेय्  लगायत थासय् सुटिंग जुगु थुगु म्युजिक भिडियोया छायांकन, सम्पादन तथा कलर करेक्सन अमर चित्रकारं यानादिगु खः ।

प्रिमियर ज्याझ्वसः मू पाहां कथं नेपालभाषाया म्युजिक भिडियोया न्हापांम्ह निर्देशकलिसे वरिष्ठ पत्रकार बिजयरत्न असंबरे,ईलोहंलिसें पेज थ्री पत्रिकाया सम्पादक दर्शनबीर शाक्य, पत्रकार बिराजकाजि राजोपाध्याय, कलाकार तथा पत्रकार सुरज ब्यञ्जनकार, पत्रकार स्वतन्त्र महर्जन लगायत म्युजिक भिडियोया दुजःपिसं थःगु नुगः खं  तया दिगु खः ।  

ज्याझ्वलय् राजोपाध्याय् समाजया नायः सञ्जय शर्मा राजोपाध्याय, नेवाः राष्ट्रिय पत्रकार दबुया नायः सुरज बीर बज्राचार्य लगायतया उपस्थिति दुगु खसाः भर्चुयल ज्याझ्वः अनुप शाक्यं न्ह्याकादिगु ख ।