खोप काइपिं मनूतयगु विवरण सूचीकृत

खोप काइपिं मनूतयगु विवरण सूचीकृत


माघ १० - कोरोना भाइरसविरुद्धया खोप काःइपिं स्वास्थ्य संस्थाया मनूतयगु विवरण थौंतकया दुने सूचीकृत यायेमाःगु जुगु दु।

खोप काःइम्ह मनूया विवरण विद्युतीय प्रणालीइ तयार याना मन्त्रालयय् छ्वयेत फुक्कं स्वास्थ्य संस्थायात निर्देशन ब्यूगु व  आःतकया दुने १ लखमल्याकं सुचिकृत जुगु स्वास्थ्य तथा जनसंख्या मन्त्रालयं धागु दु। भारत सरकारपाखें अनुदानय् वगु कोभिशिल्ड खोप कायेत सङ्घ, प्रदेश व पालिकाय् सूचीकृत जुगु फुक्कं कथंया स्वास्थ्य संस्थायात मन्त्रालयया वेवसाइटय् लगईन याना क्वःछिनातगु ढाँचाय् विद्युतीय प्रणालीइ निन्हूया दुने छ्वयेत मन्त्रालयं निर्देशन ब्यूगु खः।

स्वास्स्थ्य संस्थाय् कार्यरत कोरोनाया संक्रमण व्यवस्थापनय् अग्रपंक्तिइ खटे जुइपिं स्वास्थ्यकर्मी, सहयोगी कर्मचारी, एम्बुलेन्स व शहवाहन चालक, कोभिड–१९ या सङ्क्रमणं सिइपिंनिगु सिम्हया व्यवस्थापनय् खटे जुइपिं सुरक्षाकर्र्मी, पालिकाय् कार्यरत फोहोर व्यवस्थापन व सरसफाईकर्मीया धलः सम्बन्धित संस्था प्रमुखपाखों प्रमाणित याना मन्त्रालयया विद्युतीय प्रणालीइ छवयेमाःगु  मन्त्रालयया डाक्टर जागेश्वर गौतमं धयादिल।

भारत सरकारं कोभिड–१९ विरुद्धया खोप कोभिशिल्ड म्हीगः बिहीबाः १० लख मात्रा सरकारयात उपलब्ध याकुगु खः। सरकारं न्हापां खोपया प्राथमिकताय् स्वास्थ्यकर्मी, सरसफाईकर्मी, एम्बुलेन्सचालक लगायत अग्रपंक्तीइ च्वनाज्या यायेमाःपिन्त तगु दु।