बुंगद्यःया न्हूम्ह पान्जु नियुक्त याइगु

बुंगद्यःया न्हूम्ह पान्जु नियुक्त याइगु


पुस ६ - बुंगद्यःया रेखदेख, पूजा व जात्रा व्यवस्थापनया लागि न्हूम्ह पान्जु नियुक्त याइगु जुगु दु। बुंगद्यःया गुठीया ३१ पानेजु गठन याइगु परम्परा कथं भुवनराज शाक्य मदुगुलिइ वयकया काय् सम्पूर्णराजयात न्हूम्ह पान्जु नियुक्त यायेत्यगु खः ।

पान्जु जुइत ५ न्हू न्हय् निसें निचि याना, थीथी द्यःतयगु  पूजानापं ह्याउँगु गाः न्यया प्रक्रिया न्ह्याकागु धकाः मेम्ह पान्जु हेम बज्राचार्यं धयादिल । वयकया कथं कन्हय् मंगलबाल् ८ म्ह पान्जु च्वना पूजा याना न्हूम्ह पान्जु नियुक्त यायेगु ज्या जुइ।

बुंगद्यःथाय् न्हिच्छिइ ५ आरती याइ। द्यःयात बुंग व तःबहालय् निखे तइबलय् न्हिं ५ आरती याइगु चलन दुगु मूल पान्जु कमलराज बज्राचार्यं धयादिल । वयकया कथं प्यकः आरती आरती गुठीया मनूतयसं व छकः देगलय् च्वनिम्ह पान्जुइ बिइ।

सुथय् व बहनी छगू गुठीइ , न्हिनय् व चान्हय् मेगु गुठीइ आरती बिइगु बज्राचार्यया धापू दु । पान्जु जगतपति शाक्यया कथं द्यःयात नित्य पूजा याइबलय् पर्वकथंया थीथी स्तोत्र नं पाठ यायेमाः।द्यःया जवखव व न्हयने च्वना स्तोत्र पाठ याइगु वयकलं धयादिल।

थुगुसिइ कोरोना भाइरस संक्रमणया जोखिमया कारण २०७७ सालया रथजात्रा लिबाक्क क्वचायेकाः वंगु भदौ २९ गते जक बुंगद्ययःयात बुंगय् बिज्याकुगुलिइ ३ लाति जक अन तया वंगु मंसिर २४ गते द्यःयात तःबहाय् विज्याकुगु खः।