बोडेय् नीलबाराही प्याखं साउन २१ गते न्ह्याइगु

बोडेय् नीलबाराही प्याखं साउन २१ गते न्ह्याइगु


साउन १३ - मध्यपुर थिमि नगरपालिकाय् लाःगु बोडेय् नीलबाराही प्याखं थुगुसिइ न्ह्याइगु जुगु दु।

पुलांगु नेवाः बस्ती बोडेया नेवाःतय्सं हुइका वयाच्वंगु प्याखं गुंलागा दुतियाया बाचाइलंनिसें न्ह्याइगु खसा थुगुसिइ वइगु साउन २१ गते लागु दु। मध्यपुर नगरपालिका प्याखं न्हयाइगु जानकारी बिसें प्याखँ क्यनिगु लँय् तयातगु निर्माण सामाग्री, नीजि सवारीसाधनया पाकिङ्ग लगायत चिकेत नगरबासीतयत इनाप यागु दु। थुगुसिइ कोरोना भाइरसया संक्रमणया जोखिमया कारण यक्व जात्रा लगायत अमूर्त सम्पदात प्रभावित जुयाच्वगु इलय् नगरपालिका थुगु प्याखं संचालन जुइगु सूचं पितब्यूगु खः।

थ्व प्याखं बोडेया मे प्वाः खनीगु जात्रा लिपाया तःधंगु प्याखं व जात्राकथं नं कयातःगु दु । सापारुया कन्हय् खुनु बाचाइलंनिसें न्ह्याइगु नीलबाराही प्याखं सुथय्, न्हिनय् व चान्हय् त्वाःत्वालय् हुला क्यनी। बोडेया लाछिं न्ह्याकाः लाय्कूछेँ, विष्णुघाट, महालक्ष्मी, भाँगुत्वाः, खोँसीत्वाः, नीलबाराही जुसें नारायणद्यःयाथाय् थ्यंकाः क्वचायेकीगु परम्परा दु।