संक्रमित प्रहरीया मांम्ह च्वनाच्वंगु थसिया छेँय् सिल

संक्रमित प्रहरीया मांम्ह च्वनाच्वंगु थसिया छेँय् सिल


जेठ ९ -  महालक्ष्मी नगरपालिका–६ सिद्धिपुर थसिइ छखाः छेँय् सिल याःगु दु । महानगरीय प्रहरी वृत्त कालीमाटीइ कार्यरत निम्ह प्रहरीयाके बुधबाः कोरोना सङ्क्रमण पुष्टि जुसेलिइ इपिं मध्येया छम्ह प्रहरी नायब निरीक्षकया मांम्ह ६ न्हू न्ह्य सिद्धिपुरय् थः म्हयाय्या छेँय् वया च्वनाच्वंगुलिइ कन्टयाक्ट ट्रेसिङमार्फत जानकारी वसेलिइ स्थानीयवासीं त्रासया कारण बिहीबाः सिल याःगु खः। 

उगु छेँय् मांम्ह नापं गुम्ह च्वनावयाच्वंगु दु । वयकपिनिगु पीसीआर  विधिमार्फत कोरोना परीक्षण मजुतलें पिने सु नापं नं सम्पर्क मजुइमाः धकाः स्वीकृति कयाः छेँय् सिल यानागु धकाः नगरपालिका प्रमुख रामेश्वर श्रेष्ठं धयादिल ।

वयकपिनिगु माःगु फुक्कं सामान लगायत खाद्यान्नया व्यवस्था यानाबिइगु धासें वयकलं स्वाब परीक्षणया लिच्व वलकि जक उगु छेँय्या  सिल चायेकेगु धयादिल। 

थ्वया न्हय् न सिद्धिपुरय् पिने जिल्लां वपिं मनूत च्वनाच्वंगु सूचंया आधारय् वडा ज्याकु व  स्थानीय जाना प्यखाः छेँय् सिल यागु खः । थुपिं छेँय् यागु सिल धासाः चायेका बिइधुक्कुगु दु । थसिइ  कोरोना संक्रमणयात पनेत छेँय्  सिल यायेगु अभियान न्ह्यानाच्वंगु दु।