गंगालाल राष्ट्रिय हृदय केन्द्रय् अक्सिजन उत्पादन शुरू

गंगालाल राष्ट्रिय हृदय केन्द्रय्  अक्सिजन उत्पादन शुरू


बैशाख २० - येँया सहिद गंगालाल राष्ट्रिय हृदय केन्द्रं अक्सिजन उत्पादन शुरू याःगु दु।  येँय् महानगरपालिकां उपलब्ध याःगु २ करोड ७५ लख तका लागतय् स्थापना याःगु प्लान्टं म्हिगनिसें अक्सिजन उत्पादन शुरु याःगु खः। 

४७ लिटरया १३५ सिलिण्डर दैनिक अक्सिजन उत्पादन यायेगु प्लान्टया क्षमता दु । थुकिइ मध्ये गंगालालय् दैनिक ९० सिलिण्डरति अक्सिजन खपत जुइसाः ल्यदनिगु अक्सिजन जायेकाः मेथाय् छ्वयेफइ। थ्व (अक्सिजन जायेकिगु) प्रणाली जडान जुइ ल्यदनिइ।

प्लान्टय्  ३७ किलोवाटया एअर कम्प्रेसर, ३ डिग्री सेल्सियसतक ख्वाउँके फइगु एअर ड्रायर, १ द्वः लिटर क्षमताया एअर ट्याङ्क, २ गः अक्सिजन जेनेरेटरलगायत उपकरण तयातःगु दु ।

अक्सिजन प्लान्टया येँय् महानगरपालिकाया मेयर विद्यासुन्दर शाक्यं म्हिगः शुभारम्भ यानादिगु खः । प्लान्ट शुभारम्भलिपा मेयर शाक्यं, गंगालालय् महानगरं अक्सिजन प्लान्ट स्थापना यायेगु निर्णय याःबलय् आःथें अक्सिजनया यक्व माग मदुगु लुमंकुसें अबलें याःगु निर्णयं आःयागु महामारी व्यवस्थापनय् फाइदा जूगु न्ह्यथनादिल ।

वयकलं गंगालाल हृदय केन्द्र व कान्ति बाल अस्पताल याना २ गु अस्पतालय् महानगरं अक्सिजन प्लान्ट तयेगु धासें २ गु ठासं दैनिक २००  सिलिण्डरति अक्सिजन उत्पादन जुइ धयादिल। गंगालालय् आन्तरिक पाइप प्रणालीपाखें अक्सिजन विरामी दुगु ठासय् छ्वइगुलिं सिलिण्डर म्वागुलिं खर्च बचे जुगु धयादिल।

मुटुया समस्या जुयाः  गंगालाल हृदय केन्द्रय् वासः याकेत थ्यनिपिं बिरामीतयत निःशुल्क अक्सिजन उपलब्ध याकेत महानगरं प्लान्ट स्थापना याःगु खः। थुकिया लागि महानगर व केन्द्रदथुइ २०७६ माघ १५ गते सहिद सप्ताहया ज्याझ्वः लाका सहमति पतिइ ल्हाचिं तयेगु ज्या जूगु खः।