पचली त्यप आजुया जात्रा जुल

पचली त्यप आजुया जात्रा जुल


असोज २६-  येँय् पचली त्यप आजुया जात्रा जूगु दु ।

दँय्दसं मोहनिया पंचमी काैलाथ्व पंचमी पचिमर्ह खुनु पचली भैराःद्यः लिसें अजिमाया नं जात्रा जुइगु खः । तर थुगुसिइ कोरोना भाइरसया संक्रमणया कारण स्वास्थ्य मापदण्ड पूवकां मजिमगाःपिं मनूत जक च्वना स्वंगू रंगया पीपीइ फिनाः जात्रा याःगु दु । पचली भैराद्यःया प्रतिक कथं कयातःगु त्यपयात पचलीं टेकु, लगं, ज्याबहाः, न्हूघः चाःहिकाः जात्रा याःगु खः। हनुमानध्वाकाय् दर्शन याकेधुंकाः अजिमा लिसें पचली भैराद्यः आजुयात पचलिइ हे लित यंकीगु खः । अथेहे कुमारी माजुयात पचली भैराद्यःलिसें दृष्टि चुलाकूगु खः।

जात्राया निंतिं म्हीगः न्हिनय् थकू जुजुयाथासं त्यपयात पचलिइ हे जात्रा यानाः यंकूगु खःसा अन होम यानाः विशेष पूजा याःगु खः ।

अथेहे म्हिगः येँया ह्यूमतं नाय्खिं गणेद्यः रुद्र विनायकया जात्रा जूगु खः।