पन्ति जात्रा थुगुसिइ नं मयाइगु

जात्रा जुइगु दिं ज्या पून्हि खुन्हु साधारणपूजा जक याइगु

पन्ति जात्रा थुगुसिइ नं मयाइगु
फाइल किपाः


असार ४ - कोरोना भाइरस सङ्क्रमणया जोखिमया कारण ऐतिहासिक पन्ति (पनाैति) जात्रा थुगुसिइ नं मयाइगु जुगु दु । थगुने नं कोरोना भाइरस सङ्क्रमणया उच्च जोखिमया कारण थ्व जात्रा क्षमा पुजा याना जक क्वःचायेकुगु खः।

थ्व जात्रा ज्याः पून्हिया झ्वलय् स्वन्हू तक जुइगु खः। जात्राय् काभ्रे पलाञ्चोकलगायत जखःया जिल्ला व स्वनिगपाखें न  उल्लेख्य सहभागिता दइगुलिइ, दर्शनार्थीत म्वः म्वः जुइगुलिइ स्वास्थ्य सुरक्षाय् गम्भीर असर लाकिगु धासें पन्ति नगरपालिकां थुगुसिइ जात्रा मयासें क्षमापूजा जक यायेगु धागु दु। नगरपालिकाया वरिष्ठ प्रशासकीय अधिकृत इन्द्रप्रसाद अधिकारीइ थुगुसिइ पन्ति जात्रा जुइगु दिं ज्या पून्हि खुन्हु साधारण पुजा पूजा जक यायेगु धयादिल ।

थुगुसिइ ज्या पून्हि असार १० गते बिहिबाः लाःगु दु।

“ज्या पून्हि खुन्हू जात्रा माने मयाइपिं व योमरी पून्हिया चान्हय् मद्यनिपिंन्स गबले सुख सिइमखु धइगु धापूया विश्वासय् पन्ति जात्राय् ब्वति कायेमाःगु परम्परागत मान्यता दु । त्रयोदशीनिसें पून्हिया चान्हय् जात्रा हना पारू खुन्हुनिसे सिनाज्या याःवनिगु चलन दु।

किंवदन्तीकथं परापूर्वकालय् थ्व इलय् पन्तिया उखेपाखें वना ब्रम्हायणी व भद्रकालीया पूजा यायेत वनेत समस्या जुसेलिइ यलया बुंगं बासुकी नाग पन्ति विज्याना पुण्यमाता खुसि थहाँवयाच्वंगु ठासय् ताथें च्वना ब्युगु धकाः धाइ। उकिइ पन्ति जात्राबलय् वाः वइ धइगु नं जनविश्वास दु। जात्राया झ्वलय् भद्रकाली, महादेव व इन्द्रेश्वरद्यःया रथ सालिइगु परम्परा दु।