थौं गुंलाथ्व अष्टमी, यल पंज्रा

थौं गुंलाथ्व अष्टमी, यल पंज्रा


साउन ३२ - थौं गुंलाथ्व अष्टमी यल पंज्राया दिं।

थीथी अन्न लिसें ध्यबा दान बिया: दँयदँसं थौंया दिनय् यलय् पंज्रा वा पञ्जदान हनीगु खः। 'पंज'या अर्थ जमीनय् सइगु थीथी अन्न ख:। उकिं अन्न दान बीगु दिं जुया: थौंया दिंयात पंज्रा धाइगु ख:।

सा दुरुइ मार्सि जाकिया खीरयात पञ्जा धाइगु बौद्ध विद्वान महीश्वरराज वज्राचार्यं कनादिल। पञ्जा वा खीरदानयात हे दकलय् भिंगु दानकथं बुद्धधर्मय् कयात:गु वयकलं धयादिल। थौं यलया नेवा:तयसं पञ्जा वा खीर दयका नयगु चलन दु। थाैंया दिनय् सुथंनिसें हे आपालं भक्तजनत यलया थीथी बिहारलिसें बौद्धस्थलय् वना: दान बिइगु परम्परा दु। बुद्धधर्मय् दानया यक्व हे महत्व दु। बुद्ध जुइत मा:गु झिगू पारमिता मध्ये दानपारमिता नं छगू ख:।

स्वनिगलय् सम्यक महादान न्यायकीबले बिज्याकीपिं दीपंकर बुद्धया मूर्ती ब्वया: दान बीगु चलन दु। व हे कथं थौंया दिनय् यलया थीथी त्वालय् दीपंकर बुद्धपिनिगु मूर्ती सम्बन्धित खलकं ब्वया: दान बिइगु खः।

तर थुगुसिइ कोरोना भाइरसया संक्रमणया जोखिम दनिगुलिइ यल पंज्रा नं प्रभावित जुयाच्वंगु दु।