पशुपतिमहाद्यःयात ख्वाउपाखें बचे यायेत थौ धनुर्मास पूजा जुइगु

पशुपतिमहाद्यःयात ख्वाउपाखें बचे यायेत थौ  धनुर्मास पूजा जुइगु


पुस २५ - पशुपतिमहाद्यःयात ख्वाउपाखें बचे यायेत थौ मूल देगलय् धनुर्मास पूजा यायेत्यगु दु ।

पशुपतिमहाद्यःयाथ् आदिकालनिसें हे सौर व चान्द्र निगुलिइ मास कथं पुसय् लाःगु दिंमध्ये उपयुक्त दिनय् धनुर्मास पूजा याइगु परम्परा दु। थनिनिसें वइगु माघ २९ तक सौर व चान्द्र निगुलिइ गणना पद्धति कथं पुस महिना लाःगु दु।

पशुपतिमहाद्यःया गणनापं नवग्रहयात न न्हिच्छि चच्छि पूजा याइगु पशुपति क्षेत्र विकास कोषया कार्यकारी निर्देशक डा.घनश्याम खतिवडां धयादिल।

पार्वतीनापं महाद्यःयात ख्वाउँपाखें बचेयायेत धनुर्मास पूजा याइगु परम्परा दुगुलिइ पूजालिपा म्हययात क्वाःकिगु नसाज्वंल चाकु, साखः व खिचडी थज्याःगु प्रसादया रुपय् छाइगु परम्परा दु । थ्व पूजाय् पशुपतिया मूलभट्ट व पशुपति अमालकोट कचहरीया द्वारे लगायतं ब्वति कायेमाःगु विधि दु।

थनिनिसें आइतबाः कन्हय् बहनीतक धनुर्मास पूजा याना कन्हय् न्हिच्छि मूल देगः भक्तजनया लागि बन्द जुइगु कोषया दाभरीं डा.मिलनकुमार थापां धयादिल।

कन्हय् सुथसिया ६ ताइलिपा महाद्यःपार्वती नं निभा पावनिगु विश्वासय् देग तिइगु खः। धनुर्मास पूजा खुन्हू पशुपतिइ नित्य लिसें नैमित्तिक भोग नं बिइमखु।

मानव शरीरय् दुगु थीथी चक्रयात खुसी यायेत महिना कथंया नसाज्वलंया वर्णन शास्त्रय् यानातगु दु । चिकुला बलय् धनुथें ढुसि लुइगुलिइ याइगु पूजा जुगुलिइ धनुर्मास पूजा धयातगु नेपाल संस्कृत विश्वविद्यालयया पूर्वउपकुलपति प्रा. विदुर पौडेलं धयादिल।