नेपालय् दयेकल स्वचालित व पोर्टेवल भेन्टिलेटर

महामारीया इलय् जुइफुगु भेन्टिलेटरया अभाव चिकिगु दाबी

नेपालय् दयेकल स्वचालित व पोर्टेवल भेन्टिलेटर


बैशाख २१ -  ‘पाइला टेक्नोलोजी नेपाल’ नं न्हुगू विशेषतायुक्त भेन्टिलेटर दयेकुगु दु। स्वचालित व ‘पोर्टेवल’ थ्व भेन्टिलेटरया सफल परीक्षण लिपा मेसिनं मनूयागु स्वासप्रश्वास प्रक्रिया सञ्चालन यायेफइ। महामारीया इलय् जुइफुगु भेन्टिलेटरया अभाव चिकेत थुकिइ ग्वाहालि याइगु निर्माण पक्षं दाबी याःगु दु। म्हिगः  निर्माण टिमं थुकिया प्रयोग खिचाय् याःगु खः। खिचा व मनूया ‘डमी’ इ थ्व भेन्टिलेटरया प्रयोग परीक्षण सफल जुगु एडभान्स पेट हस्पिटलया अध्यक्ष डा.शरदसिंह यादवं धयादिल ।

‘कोरोना संक्रमणया इलय् भेन्टिलेटर अभाव जुया विश्वय् मनूत सिनाच्वगु धासें पाइला टेक्नोलोजीया प्रमुख कार्यकारी अधिकृत बिनय राउतं थ्वहे अभावयात चिकेत थज्याःगु भेन्टिलेटर दयेकेगु विचाः वगु धयादिल।

त्रिवि शिक्षण अस्पतालया एनेस्थेसोलोजिष्ट डा. नविन्द्रराज विष्टं थ्व न्हूगु भेन्टिलेटर थुथाय् आइसियुलय् संचालनय् दुगु भेन्टिलेटरतयगु ‘रिप्लेस्मेन्ट’ धासा मखु। तर मनूयाके थुकिया परीक्षण सफल जुसाः थ्व महामारीया इलय् तधंगु योगदान जुइ धयादिल।

याकंन हे थ्व भेन्टिलेटरया परीक्षण मनूयात न यायेगु धकाः निमार्ण पुचलं धागु दु।  पाइला टेक्नोलोजी नेपालया १५ म्हसिगु पुचलं  १८ न्हू विकाः थ्व भेन्टिलेटर दयेकुगु खः ।