कोभिड लनेधुक्कां नं थज्याःगु स्वास्थ्य समस्या खनेदइगु

कोरोनामुक्त जूगु ४ वाःलिपा स्वास्थ्यय् छुं समस्या खनेदसाः सर्तक जुइत चिकित्सकतय्गु सुझाव

कोभिड लनेधुक्कां नं थज्याःगु स्वास्थ्य  समस्या खनेदइगु


जेठ २६ -  कोरोना भाइरस संक्रमणं मुक्त जुइधुक्कां नं स्वास्थ्यय् थीथी कथंया समस्या खनेदुगु दु । कोभिडलिपा खनेदइगु  स्वास्थ्य समस्यायात च्यूता मक्यसाः गुलिखे अवस्थाय् बिरामी सिइफुगु तकया जोखिम दुगुलिं समस्या खनेदसाः स्वास्थ्य संस्था क्यंवनेत चिकित्सकतय्सं सुझाव ब्यूगु दु ।  

चिकित्सकतय्गु कथं विशेष यानाः कोरोनामुक्त जूगु ४ वाःलिपा स्वास्थ्यय् छुं समस्या खनेदसाः वा लक्षण खनेदसाः उकियात कोभिडलिपाया स्वास्थ्य समस्या धकाः थुइकेमाः ।

भतिचा जक न्यासी वंसाः नं स्वाँ स्वाँ जुइगु, सासः ल्ह्याये थाकुइगु, तसकं त्यानुइगु व कमजोर महसुस जुइगु, छक्कलं  रक्तचाप थहाँवनिगु वा कुहाँवनिगु, द्यने मफइगु, दिक्क जुइगु थज्याःगु  लक्षणत खनेदयेफू ।

थज्याःगु इलय् स्वास्थ्यकर्मीया परामर्श कयाः अस्पतालय् क्यंवनेत चिकित्सकतयसं सुझाव ब्यूगु दु।