नेपालमण्डल टेलिभिजनया अध्यक्षय् रमेश महर्जन हाकनं निर्वाचित

नेपालमण्डल टेलिभिजन श्रस्ता सम्मान कोष स्थापना

नेपालमण्डल टेलिभिजनया अध्यक्षय् रमेश महर्जन हाकनं निर्वाचित


पुस २५ - नेपालमण्डल टेलिभिजनया  अध्यक्षय् नेपाल सुनचाँदी रत्न तथा आभुषण महासंघया केन्द्रिय अध्यक्ष रमेश महर्जन हाकनं निर्वाचित जुयादिगु दु।

यलया भोलध्वाखाय् च्वंगु ज्यापूसमाजया भवनय् शनिबाः जुगु नेपालमण्डल टेलिभिजनया ९ क्वःगु साधारणसभांलिसें २ क्वःगु दँ मूज्यां महर्जनयात ४ दँया कार्यकालया लागि हाकनं अध्यक्षलय् सर्वसम्मतं चयन याःगु खः।

मर्हजन दोश्रो कार्यकालया लागि हाकनं अध्यक्षय् चयन जुयादिगु खः । अथेहे साधारण सभां संचालक समितिया दुजलय् उद्योगपतित पद्म ज्योति, दिपक श्रेष्ठ, ध्रुवकुमार श्रेष्ठ, अधिवक्ता मंगल महर्जन, कुमार राजा महर्जन, सिल्भिया राजोपाध्याय्, नातिभाइ महर्जन व शर्मिला महर्जनयात नं सर्वसम्मतं चयन याःगु खः।

नवनिर्वाचित अध्यक्ष महर्जनं वइगु कार्यकालय्  नेपालमण्डल टेलिभिजनं देशं दुने जक मजुसें  विदेशय् दुगु संघसस्थातलिसें जाना गुणस्तरीय ज्याझ्वः, समाचारया उत्पादन व प्रशारण यायेगु धयादिल।

ज्यापू समाजया अध्यक्ष चन्द्र महर्जनया मू पाहाँस्वीइ जुगु साधारणसभाय् नेपालमण्डल टेलिभिजनया आर्थिक वर्ष २०७६ व ०७७ या वार्षिक प्रगति प्रतिवेदन व  लेखापरीक्षक प्रतिवेदन प्रस्तुत यागु खसाः २ दँ न्हय नेपालमण्डलले टेलिभिजनं ग्वसाग्वःगु कलाकार मनराजा साँगितिक ज्याझ्वःपाखें जुगु आम्दानीइ नेपालमण्डल टेलिभिजन श्रस्ता सम्मान कोष नं स्थापना यागु दु।

उक्त कोषया लागि संस्थापक सदस्य लिसें प्रबन्ध निर्देशक प्रकाशकाजी महर्जन, उद्योगपति बाबुराजा महर्जन, ज्यापू समाजया अध्यक्ष चन्द्र महर्जन, संचालक समितिया दुजत   मंगल महर्जन,   शर्मिला महर्जन, सिल्भिया राजोपाध्ययं रकम प्रदान यानादिगु खः।

अथेहे ज्याझ्वलय् नेपालमण्डल टेलिभिजनया प्रगतिया लागि ज्यापू समाजया अध्यक्ष चन्द्र महर्जन, सल्लाहकारत रामकाजी अबाले, बाबुराजा महर्जन लगायतं भिन्तुना देछानादिगु खः।

ज्याझ्वलय् नेपालमण्डल टेलिभिजनया सल्लाहकारत, संस्थापक दुजत, शेयरहोल्डर, कर्मचारीतयगु उपस्थिति दुगु खः।  

२०६८ सालया योमरी पून्हि खुन्हू नेवाः समुदायया कला, संस्कृति, भाषा, सभ्यता प्रचार प्रसार यायेगु उद्धेश्यं नेपाःया न्हापांगु आदिवासी टेलिभिजनया रूपय् नेपाल मण्डल टेलिभिजन स्थापना जुगु खः।