बुंगद्यःयात  थाैं बुंगय् लिहाँविज्याकिगु

सुथसिया १०ः०५ निसें १०ः२० या साइत

बुंगद्यःयात  थाैं बुंगय् लिहाँविज्याकिगु


भदाै २९ - बुंगद्यःया  थाैं बुंगय् लिहाँविज्याकेत्यगु दु।

कोरोना भाइरसया संक्रमणया कारणं जात्रा चिहाक यायेगु सहमती कथं थाैं द्यःयात बुंगय् विज्याकेत्यगु खः । आ सुथसिया १०ः०५ निसें १०ः२० या साइत दुने द्यःया रथं कुहाँविज्याका खटय् विज्याका झिपलाति उत्तरपाखें कुपण्डोलपाखें स्वका यंकेधुक्का जावलाख्यपाखें चाहिका लिहाँविज्याकिगु  दैवज्ञ ज्योतिष कीर्तिकिरण जोशीं नेपालमण्डल टेलिभिजनयात धयादिगु दु।

द्यःयात बुंगय् लिहाँविज्याकेधुक्का रथया बाँयम्व थाैं कुरकिगु जुगु दु। कन्हय् निसें पुच्वय् बुंगद्यःया रथ स्यकिगु जुग दुसा चकबाद्यःया रथ धासाः तंगलय् लित यंकेधुक्का स्यकिगु रथ दयेकेज्याया सिँज्या कमि नाय दिलकुमार बाराहीं धयादिल ।  

वंगु भदौ २१  स्वास्थ्य मापदण्ड पूंवका व्यवस्थित कथं  बुंगद्यःया रथ व चकबाःद्यःया रथ साला याः न्याकुसेलिइ २२ गते भुज्या हना द्यःयात बुंगलय् लित विज्याकेत साइत स्वगु खः। अबले थौंया साइत पिहाँवगु खः ।

थ्वहे दथुइ, द्यःयात  बुंगलय् लिहाँविज्याकिबलय् छ्वालीं प्वाः च्याकिगु व लःस्ववनेगु परम्परा सिमित याइगु जुगु दु। कोरोना भाइरसया संक्रमणया कारणं मनूत म्वः म्वः जुइमज्यूगु जुगुलिइ द्यःयात लिहाँविज्याकिगु इलय् छ्वाली प्वाः च्याकेगु परम्परायात थःथःगु छेँय् न्ह्यने जक व लः स्ववनेगु परम्परायात थःथःगु वडाय् जक सिमित यायेत  यल महानगरपालिका वडा २२ या अध्यक्ष अम्बरराज शाक्यं इनाप यानादिगु दु। अथेहे वइगु असोज १ गते जुइगु प्यन्हू विचाः पुजाय् नं बुंगः पिनेच्वपिन्त ब्वति मकायेत वयकलं इनाप यानादिल ।

थ्वहे दथुइ थौ सुथय् बाराही गुथियारपाखें द्यःथाय् विश्वकर्मा पुजा यागु खः।