राजोपाध्याय समाजया न्हूम्ह नायलय् संजय शर्मा निर्विरोध चयन

राजोपाध्याय समाजया न्हूम्ह नायलय्  संजय शर्मा निर्विरोध चयन


कार्तिक ३ - स्वनिगःया आदिवासी द्यःब्रम्हू राजोपाध्यायतय् कुसा संगठन राजोपाध्याय समाजया न्हूम्ह नायलय् संजय शर्मा राजोपाध्याययात ल्यःगु दु ।

शनिबाः क्वचाःगु समाजया न्हय्क्वःगु दँमुँज्या व स्वक्वःगु तःमुँज्यां वय्कःयात समाजया न्हूम्ह नायलय् निर्विरोध ल्यःगु खः । न्हूगु ज्यासना पुचलय् न्वकू रचना शर्मा राजोपाध्याय, मू छ्यान्जेय् बिराजकाजी राजोपाध्याय, छ्यान्जेय् वन्दना राजोपाध्याय, दांभरिं उद्धव आचार्य राजोपाध्याय, ल्यू दांभरिंलय् चेतनादेवी शर्मा राजोपाध्याय च्वनादीगु दु । १३ म्ह दुजःया ज्यासना पुचःलय्  मू दुजः पदय् विजय शर्मा राजोपाध्याय, विरु सुवेदी राजोपाध्याय, सुजित जोपाध्याय, श्रीमणी राज शर्मा राजोपाध्याय, रक्षण राजोपाध्याय, महेश बाबु शर्मा राजोपाध्याय व गिरिश शर्मा राजोपाध्याय च्वनादिगु दु।

नुगः खँ तयेगु झ्वलय् न्हूम्ह नायः संजयं समाजयात छधी छप्पँ दयेकाः समाजया सर्वाङ्गिण विकासया लागिं निरन्तर न्ह्यानाच्वनेगु प्रतिवद्धता प्वंकादिल ।

वयां न्ह्यः तःमुँज्याया उद्घाटन सत्रय् नेवाः देय् दबूया नायः नरेश ताम्राकारं राजोपाध्याय खँग्वलं स्वनिगःया नेवाःतय् गुरु पुरोहित कथं म्हसिका दुपिं द्यःब्रम्हूतय्गु विशिष्ट पहिचान कुबियाच्वंगु धासें सकल द्यःब्रम्हूतय्सं मेमेगु थर च्वःसां राजोपाध्याय नं तयेमाःगुलिइ बः बियादिल। नेवाः न्ह्यलुवा लिसें मानवअधिकारवादी नेता मल्ल के. सुन्दरं द्यःब्रम्हू समाजयाके वाचन कला दुगु खँ न्ह्यथँसें थुगु हे कलायात व्यावसायिकरण यानाः आर्थिक उन्नतीपाखे न्ह्याःवनेमाःगु धयादिल ।

संक्रमणया जोखिमया कारणं समाजं थुगुसी जुममार्फत भर्च्युअल रुपं ज्याझ्वः याःगु खः ।