बालकुमारी देगः पुनर्निर्माण जुइगु

बालकुमारी देगः पुनर्निर्माण जुइगु


भदाै २०  - यल महानगरपालिका वडा ल्याः ८ या बालकुमारी देगः पुनर्निर्माण जुइगु जूगु दु। २०७२ सालया भ्वखाचं क्षति जूगु बालकुमारी देगःया पुनर्निर्माणया ज्या  शनिवाः छगू ज्याझ्वःयादथुइ शुभारम्भ याःगु खः।

देगः पुनर्निर्माणया लागत ४ करोड १० लख तका अनुमान याःगु दुसाः देगः पुनर्निर्माणया लागि यल महानगरं आर्थिक वर्ष २०७७/२०७८ या बजेटपाखें ५० लख तका  विनियोजन याःगु महानगरया मेयर चिरीबाबु महर्जनं धयादिल। वयकलं यल महानगरदुनेया भीन्द्यःया देगःया पुनर्निर्माण अन्तिम चरणय् थ्यगु धासें उपभोक्ता समिति मार्फत दयेकूगु देगःतय्गु पुनर्निर्माण इलय् हे क्वःचागु जानकारी बियादिल।

बालकुमारी मन्दिर पुनर्निर्माण समितिया कजि खड्गलाल महर्जनं दातातय्सं देगः पुनर्निर्माणया लागि ग्वाहालि यायेत इच्छा व्यक्त याःगु जानकारी बियादिल। देगः पुनर्निर्माण सुरु जूगु हे दिनय् ५ लख २० द्वः तका संकलन जूगु समितिइ धागु दु।

ज्याझ्वलय् पूर्व सभासद् रामकृष्ण चित्रकारं यलय् बालकुमारी देगःथें मेमेगु यक्व मूल्यवान सम्पदा दुगु धासें थुपिं सम्पदा यलया पहिचान व गौरव जूगुलिं संरक्षण यायेगु फुक्कसिगु दायित्व जूगु धयादिल।

ज्यापु समाज यलया अध्यक्ष चन्द्र महर्जनं संस्थागत व व्यक्तिगत रुपय् देगः पुनर्निर्माण यायेत ग्वाहालि यायेगु धयादिल।

ज्याझ्वलय् वडा ल्याः १२ या वडा अध्यक्ष नारायणलाल अवाले ,वडा ल्याः ८ या वडा अध्यक्ष हेम महर्जन लगायतं देगः पुनर्निर्माणया लागि फक्वः ग्वाहालि यायेगु प्रतिबद्धता प्वकादिल।

शनिबाः हे बालकुमारी देगः पुनःनिर्माण यायेगु लागि गजू लिकागु खसाः अबलें हे अस्थायी प्रहरी पोष्टया नं स्थापना याःगु खः।