रानीपुखुया क्वय् व ल च्वनिगु ब्वय् पखाः ग्वयेगु ज्या क्वचाल

रानीपुखुया क्वय् व ल च्वनिगु ब्वय् पखाः ग्वयेगु ज्या क्वचाल


असार १४ - येँया न्हू पुखु रानीपुखु पुनर्निर्माण अन्तर्गत पुखुया क्वय् हाकुगु चाः व अप्पा लायेगु लिसें ल च्वनिगु ब्वय् पखाः ग्वयेगु ज्या क्वचागु दु ।

राष्ट्रिय पुनर्निर्माण प्राधिकरणं उपभोक्ता समितिमार्फत पुखुया क्वय् व ल च्वनिगु ब्वःया पखाः ग्वयेगु ज्या याःगु खः।उपभोक्ता समितिया नाय अजयरत्न स्थापितं सोमबाः उपभोक्ता समितिया भालाय् दुगु ज्या  क्वचागु जानकारी राष्ट्रिय पुनर्निर्माण प्राधिकरणयात औपचारिक रूपं बिइगु धयादिल।

विसं २०७५ फागुनय् गठन जुगु उपभोक्ता समितिं पुखुया सतह व जखया पखालय् १५ निसें १८ इञ्च ख्वातुक्क हाकुगु चाः तया उकिइ च्वय् अप्पा लागु खः।

थ्वया न्हय् २०७७ वैशाख १२ (गोरखा भ्वखायया ५ दँ थ्यगु दिं) न्हय् थ्व ज्या क्वचाकेगु ज्याधलः दुसाः न कोभिड-१९ महामारी रोकथाम तथा न्यूनीकरणया लागि सरकारं लागू याःगु  लकडाउनया कारण प्रभावित जुगु खः।

क्वय् व ल च्वनिगु ब्वःया पखाः ग्वयेगु ज्या क्वचागुलिइ वातिं लं मुके छिनिगु जुगु दु । प्राधिकरणया प्रमुख कार्यकारी अधिकृत सुशील ज्ञवालीं वाति लं , त्रिचन्द्र कलेज व दरबार हाइस्कुल लागाया ल सङ्कलनलिसें प्रशोधन याना पुखुलिइ ल तयेगु ज्यायात प्राथमिकता बिइगु व मगासाः भूमिगत स्रोतया ल तयेगु व्यवस्था यायेगु जानकारी बियादिल।

दरबार हाइस्कुलया पलिया ल पुखुलिइ क्वफायेगु प्रबन्ध जुइधुक्कुगु दु ।अथेहे, तिन्ख्यलय् जम्मा जुगु ल हयेत पाइप लायेगु ज्या न जुइधुक्कुगु रानीपुखु पुनर्निर्माणया ज्या स्वयाच्वनादिम्ह  सम्पदा विज्ञ राजुमान मानन्धरं धयादिल।

थुपिं व्यवस्थापाखें न ल मगासाः मेलम्चीया ल पाइपय् तया परीक्षण याना रानीपुखुलिइ  क्वफायेगु अन्तिम विकल्प न प्राधिकरणं स्वयाच्वगु दु ।  

रानीपुखुया क्वय् पुनर्निर्माणया लागि सुरुइ  ख्वपं कालीगढ हगु खसाः अनलिपां सीप हस्तान्तरण याना येँया कालीगढ  नं सहभागी याकुगु खः ।

रानीपुखुया दथुइ च्वंगु बालगोपालेश्वरया देग, अनतक वनेगु ता व पुखु जख बालाकेगु ज्या जुयाच्वगु दु । थ्व ज्या सिए/तुलसी कन्स्ट्रक्शन जेभीय यानाच्वंगु दु । ठेक्काया ज्या न ८५ प्रतिशतति क्वचागु राष्ट्रिय पुनर्निर्माण प्राधिकरणया प्रवक्ता गोपाल अर्यालं धयादिल ।