च्वकाद्यःया मूलुखा नं बन्द याइगु जुल (भिडियो)



बैशाख ३१ - कोरोना भाइरसया कारण च्वकाद्यःया देगया मूलुखा बन्द यायेगु निर्णय जेष्ठवर्ण महाविहार विहार सुधार परिवारं यागु दु । हलिंन्यंक ब्वलना च्वंगु कोराना भाइरस कोभिड १९ या कारण स्वनिगलय् नं संक्रमितया ल्याः अप्वयाच्वंगुलिं सकसित सुरक्षित जुया लकडाउनया पालना याना विहारय् दुहाँमवयेत महाविहारं सुचं पिकागु खः ।

महाविहारं लकडाउन जुसांनिसें हे विहारया गं मथायेत व माने चाःमहिकेत इनाप याना सूचं टिका तःगु खःसा निश्चित ईलय् जक देगः भक्तजनतय्गु नितिं चायेका नृत्यपुजा यानावयाच्वंगु खः ।वंगु चैत २७ गते च्वकाद्यःया न्हवं नं म्हो जक मनूतय्गु उपस्थितिइ यागु खःसा आः देय्या स्थिति स्वया जक महाविहारया मूलुखा भक्तजनतय्गु नितिं चायेकेगु धकाः महाविहारं धागु दु ।

थ्वया न्हय् हिरण्य वर्णमहाविहार, यशोधर महाविहार, नत्वाःया गणेद्यःया देग लगायत धार्मिकस्थलत दर्शनार्थीतयगु लागि बन्द यायेधुक्कुगु खसाः वंगु बैशाख २६ गते लिपा लकडाउन छुं छुं फ्यासुकेगु सरकारया निर्णय नापं गनं गनंया धार्मिकस्थलत चायेकुगु खः ।

अथेहे यल महानगरपालिका वडा नं १२ लगंख्यया ज्याकुथिं नं थःथःगु त्वालय् च्वपिन्त पिने मवनेत व पिनेयाःपिन्त थःगु त्वालय् दुमकायेत लिसें खाद्यान्न सामानया विक्री वितरण यायेगु नितिं नं सामाजिक दुरी कायम यानाः आवश्यक जुल धाःसा त्वालय् शिल यायेत तक्क वडा ल्याः १२ नं इनाप यागु दु । अथेहे स्वनिगया मेमेगु वडां नं थः वडाबासीतयत  थथे हे इनाप यागु दु। 

(भिडियोः मीना बज्राचार्य/ नेपालमण्डल टेलिभिजन)