साहित्यकार रीतादेवी प्रधानया निगू सफू छकंल पीदन

साहित्यकार रीतादेवी प्रधानया निगू सफू छकंल पीदन


मंसिर ९ - अमेरीकाय् च्वनादीम्ह साहित्यकार रीतादेवी प्रधान रूमाठया हाइकु बांलूगु चिनाखं व बाखं विधाया निगू सफू छकंल पीदंगु दु। यलया बखुंबहालय् म्हिगः बुधबाः जूगु ज्याझ्वलय् प्रधानया फय् वःगु लँय् व तापालय् थ्वःगु सः नांयागु सफूया पितब्वज्या जूगु खः। ज्याझ्वः सिर्जना अभियान समाज व नेवाः हाइकु ख्यःया ग्वसालय् जूगु खः।

ज्याझ्वलय् प्रधानया  हाइकु बांलूगु चिनाखं सफू फय् वःगु लँय् व बाखं मुनाः तापालय् थ्वःगु सःया पितब्वज्या बाङ्मय् शताब्दी पुरूष सत्यमोहन जोशी, नेपाल प्रज्ञा प्रतिष्ठानया प्राज्ञ साहित्यकार ध्रुव मधिकःमी व अन्तरराष्ट्रिय नेपाली साहित्य समाज अनेसासया केन्द्रिय कार्यसमितिया अध्यक्षलिसे बोर्ड अफ ट्रस्टी  गीता खत्रीइ मंकाः कथं पितब्वज्या यानादीगु खः।

नेवाः हाइकु ख्यःया नायः शुरेश प्रधानया सभापतित्वय् जूगु ज्याझ्वलय् बाङ्मय् शताब्दी पुरूष सत्यमोहन जोशी, नेपालभाषा एकेडेमीया दांभरी डा पुष्पराज राजकर्णिकार, प्राज्ञ ध्रुव मधिकःमी वर्ल्र्ड नेवाः अर्गनाइजेशनया नेपाः च्याप्टरया कजि शाक्य सुरेन, समालोचक पूर्ण ताम्राकार, नेवाः हाइकु ख्यःया कजि दिल बहादुर चित्रकार तूयु पुं, अनेसासया अध्यक्ष गीता खत्रीइ साहित्यकार प्रधानया पितब्वज्या जूगु निगू सफूयात कया थःथःगु धारणा तयादीगु खः। ज्याझ्वलय् नवानादीपिं साहित्यकारपिन्सं डास्पोरा जीवनयात कःघाया च्वयातःगु प्रधानया सफूत नेवाः साहित्यख्यःया लागि न्हापांगु जूगु धारणा तयादीगु खः।

ज्याझ्वलय् साहित्यकार प्रधानं भर्चुयल माध्यमं थःगु कृतियात कया नवानादीगु खःसा ज्याझ्वः साहित्यकार पूर्णिमा शाक्य न्ह्याःकादीगु खः।

थ्वया न्हय् नं साहित्यकार प्रधानया कविता संग्रह तरंगहरू मनका, अन्धविश्वासभित्रका विश्वासहरू, सचित्र मचा उपन्यास नवाइम्ह छुँ व बाखं मुनाः  जि खनागु खँ याना ४ गू नेपालभाषालिसें नेपाली भाय्या सफू पिदनेधुकुंगु दु। अन्धविश्वासभित्रका विश्वासहरू सफू अंग्रेजी भासं न. भाय् हिलापिहाँवगु दु।