सगरमाथा सफल आरोहणया खुइन्ह्येदँ

सगरमाथा सफल आरोहणया खुइन्ह्येदँ


जेठ १६ -  थौ सगरमाथा दिवस, विश्वया सर्वोच्च शिखर सगरमाथा आरोहण सफल जुगु थौ खुइन्हयेदँ पूवंगु दु ।

सगरमाथाया च्वकाय् मनू थ्यगु लुमन्तिइ  मे २९ यात दिवस कथं हनिगु खः। सन् १९५३ या मे २९ तारिखय् न्हांपाखुसि सगरमाथाया च्वकाय् मनू थ्यगु खः । व खुन्हू नेपाःया तोञ्जिङ नोर्गे शेर्पा व न्यूजील्याण्डया नागरिक सर एडमण्ड हिलारी न्हांपाखुसि सगरमाथाया च्वकाय् थ्यगु खः ।

अनलिपा सुरु जुगु आरोहणय् लिपागु निगू दशकय् यक्व आकर्षण अप्वगु दु । तालिम प्राप्त शेर्पा, अनुकूल कापं व उच्च प्रबिधिया कारण आरोहणय् सहजतालिसें आरोहीत अप्वगु खः ।

तर थुगुसिया वसन्त ऋतुइ सगरमाथा नापं नेपाःया फुक्क हिमाल सुनसान जुगु दु। कोरोना भाइरस संक्रमणया ग्याचिकुं यात्रा दिनाच्वगुलिइ आरोही वयेफुगु मदुसाः सरकारं फुक्क हिमाल आरोहणया ज्या थुगु मौसमया लागि बन्द याःगु दु । आरोहण मजुगुलिइ सगरमाथा सिबे क्वय् खुम्जुङ, नाम्चे, लुक्ला लगायतया ठायया होटलत न सुनसान जुगु दु । वसन्त ऋतुइ २० द्वःया ल्याखँय् विदेशी पर्यटक थ्यनिगु खुम्बु क्षेत्रय् थगुने फागुन महिनाय् छुं छुं पर्यटक वसाः न अनलिपा सु न मवगु नाम्चेया पर्यटन व्यवसायी लामाकाजी शेर्पां धयादिल ।

कोरोनाया कारणं थुगुसिइ विश्वया हे पर्यटन क्षेत्र सुनसान जुगु दु ।