समय् फल्चा पुनःनिर्माण यायेत जग तल

समय् फल्चा पुनःनिर्माण यायेत जग तल
किपाः बदन न्याछ्यों


भदाै २४  -  अन्ततः कानूनी आदेश कथं यलया पुच्वय् समय् फल्चा पुनःनिर्माण यायेत जग शिलान्यास जूगु दु। समय् फल्चाया शिलान्यास यल महानगरपालिकाया मेयर चिरीबाबु महर्जन थौं सुथय् यानादिगु खः। फल्चा न्हापाः दुगु हे ठासय् पुलांगु स्वरुपय् दयेकेमाःगु माग तयाः स्थानीय बासिन्दालिसें सम्पदाप्रेमीतयसं ताःई न्हय् निसें मागः यानावयाच्वगु खः।

सर्वोच्व अदालतं २०६५ बैशाख १२ गतेया फैसलाय् साविकया फल्चा पुनःनिर्माण यायेबलय् सुनां नं पने मज्यूगु धागु खः। प्राचीन स्मारक ऐन २०१३ मथं पुलांगु स्वरुपय् फल्चा निर्माण यायेबलय् नगर विकास मापदण्ड व सार्वजनिक सडक ऐन, २०१९ लागू मजुइगु धकाः नं फैसलाय् धागु खः। वहे मर्मकथं पुलांगु हे स्वरुपय् उखेथुखे मजुइकं समय् फल्चा पुनःनिर्माण यायेमाःगु सम्पदाप्रेमीतयगु माग तगु खसाः यल महानगरपालिकां वंगु भदाै ३ गते शिलान्यास यायेत तयारी नं याःगु खः। तर अन नापं च्वंगु संस्थां ललितपुर जिल्ला अदालतय् फल्चा दयेके मबिइत अन्तरिम आदेश माग यानाः निवेदन तसेलिं यल महानगरपालिकां शिलान्यासया ज्याझ्वः दिकूगु खः।

म्हीगः मंगलबाः ललितपुर जिल्ला अदालतय् फल्चा दयेके पनेत अन्तरिम आदेश मबिसेलिं थौं सुथय् फल्चाया शिलान्यास याःगु खः। पुच्वय् दुगु समय् फल्चाय् बुंगद्यःया रथया जात्राया इलय् समयबजी नकिगु खःसा नापं च्वंगु घमा फल्चाय् रथया घमा तइगु खः। विसं २०२९ पाखें तक समय्  फल्चा दुगु स्थानीयं धागु दु।

पुच्वया स्थानीय मनूतयसं ४७ दँ न्हय् निसें मौलिक ठासय् समय् फल्चा दयेकेत सघर्ष यानाच्वंगु खःसाः २० दँ तक कानूनी उपचारया लागि संघर्ष याःगु खः।

किपाः बदन न्याछ्यों