सङ्खुवासभा सामूहिक हत्याकाण्डया मुख्य योजनाकारनापं थप ४ म्हसित ज्वन

सङ्खुवासभा सामूहिक हत्याकाण्डया मुख्य योजनाकारनापं थप ४ म्हसित ज्वन


असोज ४ - सङ्खुवासभाया मादी नगरपालिका–१ उम्लिङ खोलागाँमय् जूगु सामूहिक हत्याकाण्डया मुख्य योजनाकारनापं ४ म्हसित ज्वनाः प्रहरीइ थाैं सोमबाः सार्वजनिक याःगु दु। 

जिल्ला प्रहरी ज्याकु खाँदबारीइ पत्रकार सम्मेलन यानाः हत्याकाण्डय्  प्रत्यक्ष  संलग्न दुगु द्पनय् मुख्य योजनाकार ४७ दँया खड्गबहादुर कार्की, वया काय् २८ दँया हस्तबहादुर कार्की,  ४९ दँया रणबहादुर कार्की व वया काय् १७ दँया  नरेश कार्कीयात प्रहरीइ सार्वजनिक याःगु खः।

घटनाया मुख्य योजनाकार सिम्ह तेजबहादुर  कार्कीया ककाया काय् खड्गबहादुर जूगु प्रहरी अनुसन्धानं सिइदुगु सङ्घीय प्रहरी ज्याकु धरानया प्रहरी उपरीक्षक (एसपी) भीम दाहालं धयादिल। वय्कया कथं इमिसं तेजबहादुरयात स्यायेगु सामूहिक योजना दयेकूगु सिइदुगु दु।

अभियुक्ततय्सं रणबहादुर कार्कीया छेँय् घटना जूगु छन्हू न्हय् स्यायेगु योजना दयेकाः कन्हय् खुन्हू सुथय् तेजबहादुर कार्कीलगायत परिवारया ६ म्हसित स्यानागु धकाः स्वीकार याःगु दु। 

अभियुक्ततय्सं थपिन्त हेपे याइगु, अपशब्द नवाइगु, न्ह्याबलें ब्वः बिइगुलिं स्यानागु धकाः बयान ब्यूगु सङ्घीय प्रहरी ज्याकुया प्रहरी उपरीक्षक (एसपी) दाहालया धापू दु। थ्वया न्हय् प्रहरीइ अभियुक्त रणबहादुरया तधिकम्ह काय् २५ दँया सार्वजनिक याःगु खः।

लोकबहादुरं थः याकचां फुक्कसित स्यानागु धकाः स्वीकार यासाः नं घटनाया प्रकृति अध्ययन व लोकबहादुरया बयानया आधारय् थप मेपिं मनूतय्गु  संलग्नताया आशङ्काय् प्रहरीइ अनुसन्धान न्ह्याकूगु खः। 

वंगु भदौ २१ गते ८५ दँया बौद्धमान कार्कीया जहान ८४ दँया पार्वती, ५८ दँया काय् तेजबहादुर, ५२ दँया भौ कमला, ३२ दँया छ्यभौ रञ्जना, छुँइत ८ दँया दिपेन व ५ दँया गोमायात विभत्सं रूपं स्यानातःगु लूगु खः ।