बीबीसी मास्टर सेफया उपविजेता जुयादिल सिरहाया सन्तोष साह

बीबीसी मास्टर सेफया उपविजेता जुयादिल सिरहाया सन्तोष साह


पुस ३ - सिरहाया सन्तोष साह बीबीसी मास्टर सेफ प्रोफेसनल्स् २०२० प्रतियोगिताय् उपविजेता जुयादिगु दु ।

बिहीबाः बहनी बीबीसी वानय् प्रसारण जुगु अन्तिम प्रतिस्पर्धाय् सन्तोषं नापं मेम्ह छम्ह प्रतियोगीयात ल्यूने लाका बेलायतया हे २५ दँया आलेक्स वेबं उपाधि त्याकादिगु खः।

हलिन्यकया थीथी कुइजिनतयगु प्रतिनिधित्व याइपिं ३ दर्जनति सेफतयसं ब्वति कागु प्रतिस्पर्धाय् ‘ग्रयाण्ड फिनाले’ तक थ्यम्ह नेपाःया सन्तोष उपविजेता जुयादिगु खः । ‘तर नेपाली नसाज्वलं विश्वय् थ्यकेत व लखौं नेपालीतयगु मन त्याकेत ताःलागुलिइ उकियात जिं उपाधिसिबें तधंगु उपलब्धि कथं कयागु दु’, साहं धयादिल।

बिहीबाःया फाइनल एपिसोडय् नेपाली तपुलिइ पुनाः सन्तोषं ब्वति कयादिगु खः । अबलें वयकयाबारेय् बीबीसीइ तयार याःगु छगु भिडियो सामग्री क्यंगु खः गुकिइ सन्तोषं नेपाःया राष्ट्रिय ध्वाँय् प्रदर्शन यानादिगु दु। अन्तिम राउण्डया प्रतिस्पर्धाय् सन्तोषं क्वँय् दुगु मेला, खोले साग, फैचियागु न्ह्यपू थज्याःगु नसाज्वल चरेशया भुँइ तयादिगु खः । नसाज्वललिसें वयकलं नेवाःतयसं सगं कथं बिइगु अयलाः नं सर्भ यानादिगु खः।

हलिन्यक नांजागु बीबीसी मास्टर सेफय् नेपाली खानानापं ब्वति काम्ह न्हापांम्ह सेफ सन्तोषं फाइनलतकया प्रभावशाली यात्रा यानादिगु खः।