बाङ्मय शताब्दी पुरूष सत्यमोहन जोशीया थौं सच्छि व छदँ बुदिं

थौं सच्छि फुनाः सच्छि व छदँ क्यंगु बुन्हि।

बाङ्मय शताब्दी पुरूष सत्यमोहन जोशीया थौं सच्छि व छदँ बुदिं
@krmaharjan / Nepal Mandal TV


बैशाख ३० - बाङ्मय शताब्दी पुरूषलिसें संस्कृतिविद्  डा सत्यमोहन जोशीं थौं गतेया हिसाबं सच्छि व छदँ बुदिं हनाच्वनादीगु दु।

नेस द्वःछि व पीदँ  बैशाख ३० गते, थौंया हे दिनय् जन्म जुयादीम्ह सत्यमोहन जोशी नेपालभाषा साहित्यय् झी दथुइ दनिम्ह दकलय् ज्याथम्ह साहित्यकार नं जुयादी। भाषारत्‍न उपाधीं छायपियातःम्ह जोशीं साहित्यया फुक्क हे धैथें विधाय् ल्हाः न्ह्याकादीगु दु। पाठ्यःसफुतिंनिसें कयाः संस्कृति, लोक साहित्य, कविता, महाकाव्य, भाषा व्याकरण, ऐतिहासिक व भावनात्मक प्याखं लिसें अनुवाद व मचा साहित्यया रचना नं यानादीम्ह जोशीया दकलय् न्हापां पिदंगु रचना प्रार्थनाु नांया कविता खः।

वयकया जयप्रकाशजु महाकाव्यया लागिं नेस द्वःछि  व न्हेयन्यादँय् श्रेष्ठ सिरपा नं लःल्हागु दुसा नेस झिंछसः व खुदँय् लाकौल सिरपां नं वयकःयात छायपिउगु खः।

नेपाली साहित्यय् दकलय् नांजाःगु मदन पुरस्कार स्वकःतक त्याकादीम्ह सत्यमोहन जोशीयात काठमाण्डु विश्वविद्यालयं मानार्थ डाक्टर अफ लेटर्स उपाधी नं देछायधुंकूगु दु। अथेहे यल महानगरपालिकाया दच्छितक वयकया सच्छि बुदिं हसें महाविद्यावारीधिया उपाधि नं लल्हागु दु।

भाषा साहित्य लिसें संस्कृतिया लागिं वयकः अझं उत्तिकं हे सकृय जुयादी। वयक नेपालमण्डल टेलिभिजनया सल्लाहकार नं जुयादिइ।