जनबहाःद्यःया रथयात्रा शुरू, द्यः असनय् थ्यन (फोटो)

जनबहाःद्यःया रथयात्रा शुरू, द्यः असनय् थ्यन (फोटो)


बैशाख ७ -  वर्षा व सहकालया द्यः जनबहाःद्यःया रथ यात्रा थौं येँय्या तीनधारा पाठशालां सुरु जूगु दु। दँय् दसं चौलाथ्व अष्टमी खुन्हू दरबारमार्गयात तीनधारा पाठशालां रथयात्रा सुरु याइगु खः।

तीनधारा पाठशालां शुरू जूगु रथयात्रा रत्नपार्क, भोटाहिटी जुकाः मंगलबाः असनय् थ्यकुगु दु। थौं रथयात असनय् तइसाः बहनी राष्ट्रपति विद्यादेवी भण्डारीइ द्यः दर्शन याना प्रसाद ग्रहण यानादिगु ज्याझ्वः दु।

थगुने कोरोना महामारीपाखें बचे जुइत लकडाउन तयातगुलिं जनबहाःद्यःया रथयात्रा यायेमखंगु खः। थुगुसिइ स्वास्थ्य सुरक्षाया मापदण्ड नालाः  रथजात्रा संचालन याःगु खः येँय् महानगरपालिकाया मेयर विद्यासुन्दर शाक्यया उपस्थितिइ गुठी संस्थान, जनबहाःद्यःया पुजारी, रथ सालिगु लँय् लाःगु संघसंस्थाया प्रतिनिधि, हिन्दू व बौद्ध धर्मावलम्बी, संस्कृतिविद्लगायत सरोकार दुगु निकायया प्रतिनिधिया उपस्थितिइ जूगु सहलहखँय् स्वास्थ्य सुरक्षाया विधि नालाः रथजात्रा संचालन यायेगु निर्णय याःगु खः।

कोरोना संक्रमणपाखें बचे जुइत जात्राय् ब्वति काइपिन्सं अनिवार्य मास्क तयेमाःगु  व्यवस्था याःगु दुसाः जात्राया लागि येँय् महानगरपालिकाया स्वास्थ्य विभागलिसेंया सहकार्यय् निःशुल्क मास्क बिइगु व्यवस्था याःगु दु। छन्हू रथ सापिन्सं मेगु दिनय् रथ सालेमदुगु नियम दयेकुगु दु। थुकिया लागि ३ रङया ज्याकेटया व्यवस्था यानातगु दु।

रथया निन्हूया दिं कन्हय् असनं वसन्तपुलि जुकाः कालभैरव न्हयनेतक सालिइसाः कसं  स्वन्हूया दिं वसन्तपुरं लगमय् यंकाः जात्रा याइगु परम्परा दु। तीनधारा पाठशालान्हयने  ३२ ल्हाः ताहाकगु रथ दयेकाः चौलाथ्व अष्टमी खुन्हू सालिगु खः ।