थौं तछलाथ्व षष्ठी, सिथिनख:

थौं तछलाथ्व षष्ठी, सिथिनख:


असार २ - थौं तछलाथ्व षष्ठी, सिथिनख: । थौंया दिंनय् नेवा:तय् तुं, ल्वहँ हिति लिसें ल:या स्रोत यचुपिचु याना: देपूजा हनिगु परम्परा दु ।

देगः पतिकं माय्, मू, कःसूया वः, चतांमरी लिसें थीथी नसाज्वलं तयाः पूजा याःवपिं भक्तजनतय् हूल मुनीगु पुलांगु नेवा:भासं षष्ठी तिथियात सिथि धाइगुलिं षष्ठी तिथिखुनु हनीगु नख: जुया: सिथि नख: धयात:गु ख:। सिथि नखबलय् खुगः छ्यं दुम्ह कार्तिकेय कुमार बुगु दिं कथं कयाः कुमारया पूजा याइगु चलन दु । कुमारया बुदिं जूगुलिं थौंया दिंयात कुमार षष्ठी धका: नं धायगु या:।

थौं येँया न्हूघलय् च्वंम्ह कार्तिकेय कुमारया देगलय् विशेष पुजा यायेत न्हिच्छि ब्वयातइगु खः । सिथिनखः खुन्हू सिथि द्यःयात देगुद्यः भाः देपुजा मदुपिनी नं पुजा वया देपुजा भ्वय् न्यायेकी सा मदुपिनि आत्मां पुण्य संचय याये फयेमाः धकाः सच्छि व च्याप्वा: देवाः मत नं च्याकेगु ज्या याइ । न्हापा सिथि द्यःयात येँयाःया रुटय् थःने क्वने व किलाघलय् चाहिकेगु परम्परा दुगु खःसा स्वंगू दशक न्ह्यः निसें थ्व परम्परा दिइधुक्कुगु दु। अथेहे थाैयां दिं खुन्हु ख्वपया चासुख्यःया चण्डेश्वरी व थिमीया बुंगद्यःया जात्रा जुइगु खः ।

थ्वहे झ्वलय्, सिथिनख:बले तुं लिसें ल:या मूहान सफा यायेगु नेवा परम्परा कथं थौंया दिंयात ल: दिवस कथं नं हनावयाच्वंगु दु । थौं सफा याइगु तुंथि नापं ल:या मूहानय् प्यन्हु तक ल: काइमखु।

थुगुसि कोरोना भाइरसया संक्रमणं याना: सरकारं निषेधाज्ञा तयातःगुलिं आपाथें धार्मिक परम्परा साधारण किसिमं जक न्यायेका वयाच्वंगुलिं थाैया सिथिनखः खुन्हू जुइगु फुक्कं ज्याखँ न अथेहे जुइत्यंगु दु।