सिथि द्यःया न्हवं जुल

सिथि द्यःया न्हवं जुल
फाइल किपाः


जेठ ३० - तछलाथ्व तृतिया  खुन्हू येँया सिथि द्यःया न्हवं यायेमाःगु परम्परा कथं थाैं न्हवं जूगु दु।

कोरोना संक्रमण पनेत निषेधाज्ञा तयातःगु कारणं मेबलय् सनिलय् याइगु सिथी द्यःया न्हवं  थुगुसिइ नं न्हिनय् याःगु खः। न्हवं न्हूघः न्ह्यनेसं च्वंगु मण्डपय्  याइगु खः। थगुने नं कोरोना संक्रमण पनेत तयातगु लकडाउनया कारणं  सिथि द्यःया न्हवं न्हिनय् जूगु खः।

कुमार, कार्तिकेयया नामं म्हस्यूम्ह महाद्यः व पार्वतीया तःधिकम्ह काय् सिथी द्यःयात सिथी नखःया प्यन्हु न्ह्यः थया दिं द्यःछेँय् पितहयाः थसिया नेमकुल पान्जुपाखें पुजायाये धुंका धलिं लुइकेगु ज्या जुइगु खः । सादुरु व लः पाखें सिथिद्यःयात धलिं लुइकेगु ज्या क्वचाल कि चाैंथीनिसें लँपु छायेगु ज्या शुरु जुइ । सिथि नखः छन्हु न्ह्यः पंचमी खुन्हू अन हे च्वंगु द्यः फल्चाय् बहनी गुंगू कर्म पुजा राजोपाध्याय पाखें होम यानाः क्वचायेकीसाः  कन्हे कुन्हु अर्थात सिथिनखः खुन्हू  न्हिच्छि सर्वसाधारणया नितिं ब्वयातइ । सिथिनखः खुन्हू खुन्हू सिथि द्यःयात देगुद्यः भाः देपुजा मदुपिनी नं पुजा वया देपुजा भ्वय् न्यायेकी सा मदुपिनिगु आत्मां पुण्य संचय याये फयेमाः धकाः १०८ देवाः मत नं च्याकेगु ज्या जुइ ।

न्हापा न्हापा सिथि द्यःयात येँयाःया रुटय् थःने क्वने व किलाघलय् चाहिकेगु परम्परा दूगु खःसा स्वगू दशक न्ह्यः निसें थ्व परम्परा दिइधुक्कुगु दु।