ख्वपया सामुदायिक गुँइ मनूया कवं लूत

ख्वपया सामुदायिक गुँइ मनूया कवं लूत


मंसिर ८ - ख्वपया छगू सामुदायिक गुँइ (वन) मनूया कवं लूगु दु। म्हिगः चाँगुनारायण नगरपालिका वडा ल्याः ९ ताथलीया ठूलोपाखा सामुदायिक वनय् मनूया कवं लूगु महानगरीय प्रहरी परिसर ख्वपया प्रहरी नायब उपरीक्षक दीपक गिरीइ धयादिल।

कवं आमलीया सिमा क्वय् लूगु व सिमाया कचाय् जुटया खिपं चबुयाच्वंगु अवस्थाय् लूगु प्रहरी नायब उपरीक्षक गिरीइ धयादिल। घटनास्थलं एचपी इन्भेन्ट च्वयातःगु हाकूगु रंगया म्हिचाः,  चेक सर्ट, चक्कु, प्लाष्टिकया फिता, प्लास्टिकय् प्वःचिनाःतःगु रुद्राक्ष, वाः चुलेगु ब्रस, मास्क, पत्रिकाया टुक्रा, खरानी रंगया गोल्डस्टार लाकां, सुप्रिम च्वयातःगु तूयुगु टिसर्ट, गोल्ड ओरिजिनल च्वयातःगु हाकूगु ज्याकेट व खरानी रंगया पाइन्ट लूगु वय्कलं धयादिल। प्रहरीइ कवं पोष्टमार्टमया लागि ख्वप दुवाकोटया केएमसी अस्पतालय् छ्वगु दु।

थज्याःगु  हुलिया वा लं फिनातःम्ह मनू तनाच्वंगु जुसाः प्रहरी वृत्त जगाती वा ख्वप परिसरय् स्वापू तयेत प्रहरीइ इनाप याःगु दु।