थाैं सुर्य ग्रहण, सुथसिया १०ः५० मिनेटय् शुरू जुइगु

थाैं सुर्य ग्रहण, सुथसिया १०ः५० मिनेटय् शुरू जुइगु


असार ७ - तछलागा औँसी, थाैं खण्डग्रास सुर्य ग्रहण जुइत्यंगु दु ।

नेपाल पञ्चाङ्ग निर्णायक समितिया कथं ग्रहणं सुथसिया १० ई जुया ५० मिनेटय् शुरू जुइ। न्हिनसिया १२ ई जुया ३८ मिनेटय् मध्य अवस्थाय् वइगु व न्हिनसिया  २ ई जुया २३ मिनेटलिपा क्वचाइगु पात्रोय् न्ह्यथनातःगु दु ।थ्व ग्रहणया अवधि ३ घाै व ३३ मिनेटया जुइ । 

थुगुसिइ नेपालं सूर्यग्रहण थाैं हे जक खनेदइगु समितिइ धागु दु । नेपाःया कालापानी, लिम्पियाधुरा व लिपुलेक क्षेत्रं धासाः ९८ प्रतिशततक सूर्ययात हाकुगु किचलं तपुगु खनेदइसा स्वनिगलं सूर्ययात ८८ प्रतिशत तपुगु खनेदइ।

थाैया ग्रहण कङ्गो, इथियोपिया, दक्षिणी सुडान, मस्कट, यमन, ओमान, पाकिस्तानया दक्षिणीभाग, भारतया देहरादुन, कुरुक्षेत्र, चीनया तिब्बत लगायतया ठासं नं खनेदइगु वरिष्ठ खगोलविद्तयसं धागु दु।

अथेहे थाैंया खण्डग्रास सुर्यग्रहण थीथी राशीयात थीथी कथंया फल बिइ धकाः ज्योतिषतयसं धागु दु।  मिथुन राशिलिसें मृगशिरा व आर्द्रा नक्षत्रया व्यक्तितयत अतिकष्ट जुइगु इमिसं धागु दु। वृष, मिथुन,कर्कट, तुला, वृश्चिक, धनु ,कुम्भ व मीन राशीइ नकारात्मक प्रभाव लाकिगु व  मेष, सिंह, कन्या व मकर राशियात ग्रहणं विशेष फाईदा बिइगु धकाः धयातगु दु । अथेहे मेष राशियात श्री प्राप्ति, वृषयात क्षति, मिथुनयात घात, कर्कट व्यय, सिंहयात लाभ, कन्यायात सुख, तुलायात मान नाश, वृश्चिकयात कष्ट, धनुयात स्त्रीपीडा, मकरयात सुख, कुम्भयात चिन्ता व मीनयात व्यथा जुइगु पात्रोय् न्ह्यथनातःगु दु ।