थाैं सिनाज्यालिसें धौबजिया विशेष दिं

थाैं सिनाज्यालिसें धौबजिया विशेष दिं
@krmaharjan / Archive


असार १५ - वा उत्पादनय् वृद्धि–आत्मनिर्भरता व समृद्धि नारा थ्वयेकाः थौं १७ क्वःगू राष्ट्रिय वा दिवसलिसें सिनाज्या महोत्सव देन्यंक हनाच्वंगु दु।

थौं सकस्यां थःपिनि लोक सिनाज्याया म्ये हालाः बुँइ वा पीगु याइ। दच्छिन्यंक नयेत गाक्क वा सयेकेमाःगुलिं बुँज्या याइपिनि निंतिं थुथाय् तसकं लिमलाःगु ई खः।

सिनाज्याया इलय् थाकुक्क यायेगु ज्या लोमंकेत बुँइ ध्याचलं छ्वाकाः म्हिताः न्ह्यंपुकेगु चलन हलिंन्यंक हे दु।

थ्वहे झ्वलय् सिनाज्या याइपिन्सं शक्ति प्राप्ती यायेत धौ बजि नयेगु चलन नं दु। सिनाज्या इलय् धौबजि नल धाःसा म्ह सिचुकाः शक्ति सञ्चय जुइगु विश्वास यानातःगु दु। असार १५ यात नेपाःया समाजय् धौबजि नयेगु नखःकथं नं हनेगु याः। बुँज्या मयाइपिन्सं नं दच्छिइ छक्वः थौं छन्हु जक सां वा पीमाः धकाः बुँइ वनेगु चलन दु।

नेवाः समाजय् बुँज्या याइपिं न्हियान्हिथं म्हो जुयावंगु व बुँ नं मीगु ज्या जुया वनाच्वंगुलिं सिनाज्याया महत्व थूपिं नं म्हो जुया वनाच्वंगु दु। स्वनिगः दुने ल्यं दनिगु छुं प्रतिशत बुँ जक सां मीगु ज्या दिकाः आः ल्यंकेगु ज्या यायेमाः धकाः विज्ञ व सरोकार तइपिन्सं धयाहःगु दु।

देय् हे अन्न व बुँइ जुइगु उत्पादनय् परनिर्भरता अप्वया वनाच्वंगु इलय् थःपिनि हे बुँ ल्यंकेगु व उत्पादन यायेत हःपाः बीगु नीति सरकारीस्तरं हे हयेमाः धकाः सः नं थ्वयाच्वंगु दु। 

नेपालय् मुक्कं ज्या यायेज्यूगु बुँ मध्ये ४७ प्रतिशत बुँइ जक बुँज्या जुयाच्वंगु दु। उकी मध्ये तराइ लागाया हिस्सा ७० प्रतिशतसिबें अप्वः दु।