ढोलाहिटी–सुनागू लँ मङ्सिर १५ दुने पीच याइगु

ढोलाहिटी–सुनागू लँ मङ्सिर १५ दुने पीच याइगु


कार्तिक २६ - यलया ढोलाहिटी–सुनागू लँ वइगु मङ्सिरया निगूगु वाःतकया दुने पीच याइगु जुगु दु।

३ किलोमिटर ताःहाकगु थुगु लँ पीच याकनं यायेमाःगु माग तया स्थानीयं तकमछि लँ बन्द याना विरोध प्रदर्शन यायेधुक्कुंगु दु। कात्तिक मसान्ततक बेसया ज्या क्वचायेकाः मङ्सिर १५ तकया दुने पीच जुइगु काठमाडौँ उपत्यका सडक विस्तार आयोजनाया प्रमुख गुरु अधिकारीं धयादिल। वयकया कथं स्थानीयलिसें  निर्माण कम्पनीं लँ दयेकेज्या जुयाच्वगु इलय् न्हिं निकाः लः तया धुँ कम यायेगु सहमति जुगु दु। 

थ्व लँया दयकेगु भाला काःगु सैलुङ निर्माण कम्पनीइ ज्या यानाच्वंगु आयोजनां धागु दु। थुगु लँय् पीच याकनं यायेमाःगु माग तया वंगु असारय् स्थानीयं लँ बन्सद याःगु खः। आयोजनां न्हापां क्वःछिनातगु मापदण्ड २० मिटर तब्याःयाना लँ दयेकेत स्वगुलिइ लिबागु वयकलं धयादिल।

मन्त्रिपरिषद्या थगुने पुस ३ गतेया बैठकं स्वनिगलय् विस्तारया झ्वलय् दुगु फुक्कं लँय् उपलब्ध चौडाइलय् हे पीच यायेगु निर्णय यागुलिइ वहे कथं यायेत्यगु खः। 

ढोलाहिटी–लेले सडक विस्तार ४ दँ न्हय् शुरु जुगु खः। आःनं टाखेल–लेलेलगायत चौडाइ उपलब्ध दुगु ठासय् मापदण्डकथं हे विस्तार  जुयाच्वंगु दु। आयोजनां थगुने हे ठेचों टाखेलतकया लँ दयेकुगु खः। 

गुलि चौडाइ उपलब्ध दु उलि हे निर्माण यायेगु सरकारया निर्णयलिपा आयोजनां फुक्कं सडकया निर्माण ज्या न्ह्याकुगु दु। वइगु पुसतकया दुने फुक्कं लँ दयेके  क्वःचाइगु आयोजनां धागु दु। तकमछि ठेक्काया अवधि थप जुइधुक्कुगुलिइ आः यायेमछिगुलिइ कम चौडाइलय् हे पीच यायेत्यगु दु।