तिथि शुरू जुइसातकि वहे तिथीया ज्या यायगु शास्त्रीय मान्यताकथं थाै किजापूजा

तिथि शुरू जुइसातकि वहे तिथीया ज्या यायगु शास्त्रीय मान्यताकथं  थाै किजापूजा


मंसिर १ - थुगुसिया तिथी निन्हू क्यगुलिइ म्हिगः आइतबाः म्हपुजा यापिन्स थौं किजा पुजा यानाच्वगु दु। चान्हयया इलय् शुद्ध औँशी काल दुगुइलय् लक्ष्मीपूजा याइगु शास्त्रीय मान्यता काइपिन्सं थाैं किजा पूजा यानाच्वंगु खः।

तताकेहेंपिन्सं थ: दाजुकिजापिन्त थौं मन्द: च्वया: गुबलें गनीमखुगु चिकंमन्द: थाना: ग्वयस्वां क्वखाय्‌का: किजापुजा याय्‌गु चलन दु। सत्ययुगय् थ: केहें यमुनां यमराजयात ब्वना: सा-सा:गु नसाज्वलं देछाया: पुजा या:गु किम्वदन्ति दु। थ: केहेया पुजां लयताया: यमुनाया ईच्छा कथं यमराजं मनूतयसं नं थ: तताकेहें व दाजुकिजां थ:थवय् पुजा याना: ईच्छासिद्धि याय् दय्‌मा धका: वरदान ब्यूगुलिं उबलेंनिसें हे कछलाथ्व: दुतिया खुनु किजापुजा याय्‌गु चलन सुरु जूगु धार्मिक विश्वास दु।

अथेहे, मेगु किम्बदन्ती कथं, आयु फुइधुंकूम्ह थ: किजायात यमराजं का: व:सां तताम्हं किजापुजा याना: चिकंमन्द: व ग्वयस्वां मगंत्तले यंकेदइमखु धका: बचं बीकूगुलिं किजा ता:आयु तक म्वा:गु ख:। उबलेंनिसें किजापुजाया चलन सुरु जूगु नं जनविश्वास दु। किजापुजाया झ्वलय् तताकेहेंपिन्सं थ: दाजुकिजायात सा:सा:गु भिंगु नसाज्वलं नकिसा दाजुकिजापिन्सं नं थ: तताकेहेंपिन्त दक्षिणा व दोहलपा बीइ।

उखे, मैथिली व भोजपूरी समाजय् भरद्वितीयाया नामं थौं किजापुजा हनाच्वंगु दु।