कोरोना संक्रमितया लागि ‘हेल्लो डाक्टर सेवा’ सुरु, भाइबरपाखें परामर्श कायेफइगु

कोरोना संक्रमितया लागि ‘हेल्लो डाक्टर सेवा’ सुरु, भाइबरपाखें परामर्श कायेफइगु


बैशाख २६ - नेपाल उद्योग वाणिज्य महासङ्घं एफएनसीसीआई अपरेसन कोभिड रिलिफ नेपाल अभियान शुरू याःगु दु । महासङ्घलें थ्व अभियानअन्तर्गत न्हापांगु ज्याझ्वः कथं आइतबाःनिसें हेल्लो डाक्टरया सेवा सुरु यायेत्यगु खः।

थुकिइ भाइबरया सहकार्य दुगु दुसाः चिकित्सकं स्वास्थ्य परामर्शदाताया रूपय् सेवा बिइगु जूगु दु । कोभिड सङ्क्रमित जुया छेँय्  वा आइसोलेसनय् दुपिं व चिकित्सकया सल्लाह परामर्श कायेत थाकुगुलिं हेल्लो डाक्टरमार्फत ग्वाहालि कायेफइगु महासङ्घं धागु दु । हेल्लो डाक्टर भाइबरमार्फत कोभिड सङ्क्रमित बिरामी व डाक्टरदथुइ प्रत्यक्ष सम्पर्क याकाः परामर्श बिइगु ज्या जुइगु महासङ्घं धागु दु ।शुरूइ ५ म्ह डाक्टरपाखें परामर्श सेवा शुरू याइगु जूगु दु ।

थुकिया लागि सुथसिया ९ः०० निसें १२ः०० ताईतक व न्हिनय्  ३ः०० निसें ६ः०० ताईतकया लागि ई बियातगु दु । नां दुतिनेत बिरामीइ २११११२११११ भाइबर नम्बरय् म्यासेज यायेमाः व वहे म्यासेजया आधारय् डाक्टरलिसेंया परामर्शया ई बिरामीयात छ्वइ।

अनंलिपा  डाक्टरतयसं भिडियो कलमार्फत बिरामीलिसें खँ ल्हाना परामर्श बिइ । म्यासेजय् बिरामीइ थःगु नां, उमेर व ठाय्बाय् बिइमाः । थ्व सेवा निःशुल्क जुइगु व देयन्यकंया फुक्कं सङ्क्रमिततयसं कायेफइगु धागु दु।