गुथि विधेयकया विरोधय् नेवाःतयसं याःगु विशाल जनप्रदर्शन दच्छि दत

गुथि विधेयकया विरोधय् नेवाःतयसं याःगु विशाल जनप्रदर्शन दच्छि दत


असार ४ - सरकारं विवादास्पद गुथि सम्बन्धी कानूनयात एकीकरण व संशोधन यायेत हःगु विधेयक खारेज यायेमागु माग तया नेवाः समुदाय नं विशाल जनप्रदर्शन याःगु थनिं दच्छि दत।

थगुनेया असार ४ गते गुथि विधृयक हगुया विरोधय् नेवाःतयसं विशाल जनप्रदर्शन याःगु खः।

सरकारं भूमिसुधार, सहकारी तथा गरिवी निवारण मन्त्रालयमार्फत् राष्टिय सभाय् पेश जूगुु विधेयक लित कया जक मगाः खारेज हे यायेमाः धकाः येया फिब्वः ख्य: माइतीघर मण्डलाय् नेवातयगु विशाल जनप्रदर्शन जुगु खः । फिब्वः ख्यलय् प्रर्दशन जुइ न्हय् नेवातयसंं पूच्व, बसन्तपुर, टेकु, रत्नपार्क, न्हू बानेश्वर लगायतया ठासय मुना जुलुस सहित अन थ्यकवंगु दु। थुकिया छन्हू न्हय २०७६ असार ३ गते सनिलय् भूमि व्यवस्था, सहकारी तथा गरिवी निवारण मन्त्री पद्मा कुमारी अर्यालं पत्रकार सम्मेलन याना विधेयक लितकया धकाः पत्रकार सम्मेलन याना धयादिगु खः ।

तर उकियात लित कयां जक मगाः, खारेज हे यायेमाःगु माग यासें असार ४ गतेः लखौलखौ नेवात विरोधय् कुहाँवगु खः। विधेयक खारेजया माग यानाः स्वतःस्फूर्त रुपं मनूत सडकय् कुहाँवगु खः।

थुगु विशाल जनप्रदर्शन लिपा असार १० राष्ट्रियसभाय् न्ह्यब्वयातःगु गुठी विधेयक भूमि व्यवस्था, सहकारी तथा गरिबी निवारण मन्त्री अर्यालं लित कयादिगु खः। तर अबले वयकलं प्रयोग यानादिगु धापूयात कया नेवाः समुदायं नं आपत्ति प्वकुगु खः ।

थ्वहे दथुइ, थौं कोरोना महामारीया संक्रमण जोखिमयात बिचाः यानाः गुथि विधेयक विरुद्ध एकीकृत आन्दोलनया ग्वसालय् भर्चुअल सभा जुइत्यंगु दु। न्हिनसिया ४ ताः इलय् जुइगु भर्चुअल सभाय् नेवाः न्ह्यलुवाः मल्ल के सुन्दर वरिष्ठ अधिवक्ता प्रा पूर्णमान शाक्यलगायतं थःगु धारणा तयादिइ।

अथेहे राष्ट्रिय पहिचान संरक्षण संयुक्त संघर्ष समितिं किपा ब्वज्या व बहनी मत च्याकेगु ज्याझ्वः तयातःगु दु । गुथि आन्दोलनया मर्म पूमवंनी, खबरदारी ल्यना हे च्वंगु दनि धइगु नारा थ्वयेकाः संघर्ष समितिं न्हिनसिया १ः३० इलय् फिब्वः ख्यलय् किपा ब्वज्या यायेत्यंगु दुसाः बहनी ७ः३० ताः इलय् अन हे मुनाः मत च्याकेगु ज्याझ्वः नं तयातःगु दु। अथेहे थःगु त्वाः बहालय् मत च्याकेत नं इनाप याःगु दु।

अथेहे गुथी आन्दोलनया मु घटक सेभ नेपा भ्याली अन्तर्गत गुथी आन्दोलन नेतृत्व याःगु पासा पुचतयत बहनी ७ः३० इलय्  थःथगु लागाय् मत च्याकेत इनाप यानातःगु दु ।